Shillong, Jylliew 15: Ha dien ka jingkhylliap noh ia ka Ranikor Block Congress Committee ha kine ki sngi ha dien baroh ki nongkit kam jong ka seng kila leit ban pyniasoh sha ka party NPP, ka Meghalaya Pradesh Congress Committee (MPCC) mynta ka sngi kala thung ia u Bah P K Nongmin ba un long u Convener jong ka party hapoh jong ka Ranikor Konstitwensi.
U Bah James Lyngdoh Working President jong ka MPCC haba kren ha u SP News Agency u la iathuh ba ka party kam lah ban shu ieh kumta khlem da don ki nongkit kam jong ka party kumta la thung ia u Bah Nongmin ba un long u Convener jong ka party hapoh jong ka 35-Ranikor Konsitwensi.
Haba jubab ha kaba ia dei bad u MLA jong ktei ka jaka u Martin M Danggo u la ong ba haduh mynta u dang dei u MLA jong ka seng Congress bad haduh mynta kam shym la don kano kano ka jingujor pyrshah ia u ka party ka shim hi ba u dei u MLA jong ka seng Congress, halor ka jingiakular ia kata kan long ne kam long kim don jingtip.
U Bah Lyngdoh, u la kren shai ba u Martin M Danggo u dei u MLA jong ka seng Congress, lada u hiar shuki noh kata kala te kila ia khlad lok. La ong ba na ka liang jong u la kwah ban ia kynduh ia u Bah Danngo hynrei ym shym pat ioh lad.
