Shillong, Naiwieng 14: Na ka daw jong ki jingiakhih kaba la long ha ka skul bah North Eastern Hill University ka tnad pule puthi jong ka sorkar pdeng kala thung ia ka kynhun tohkit kaba arngut bad la ai por 15 sngi ban ai ia ka kaiphot sha ka sorkar pdeng.
Ki ar ngut kiba la thung ha kane ka kynhun tohkit ki l ong u Prof. D P Singh u ba dei u shongknor barim jong ka UGC, un long u shongknor kane ka kynhun tohkit bad u wei pat u dkhot dei u Prof. Dilip Chandra Nath ba dei u VC barim ka Assam University.
Ka jingtohkit kan long halor kine ki jingkynnoh, ka jinghiar ha ka kyrdan ha ka jingbuh ia ki jaka pule, kaba la leh da ka National Institutional Ranking Framework (NIRF) kane ka jinghiar la kynnoh ba ka dei na ka jingpyniaid bakla.
Ka jingshah kynnoh leh bakla iaka rukom thungkam, ka jingkynnoh ka long ba ka jingleh bakla ia ka rukom thung kam, kane kynthup ia ka jingthung kam ia u Registrar bad ia u Deputy Registrar, ha kaba la kynnoh kaba la wanrah ia ka jinghiar jong ka skul bah.
Ka jinglehklet ha ka jingshna ia ki jingtei haka skul bah, la kynnoh ba kam shym don ka jingsumar ia ki iing ki sem ki jingtei bad kiwei ki jingdon kam kiba don kam ma ka por, ha kaba la kynnoh ba kane kala ktah ia ka jingpule bad ka jingdon kam ki samla pule katei ka skul bah.
Ka jingbym long bala kloi na ka liang jong u Vice Chancellor ban ia kynduh ne ban pynurlong ia ki jingdon kam kumba kila ai da ki jingthoh ia kaba la kynnoh ba u VC u leh bym suidniew, bad ka jingdawa ban wan rah katto katne ki jingpynthymmai.
Halor kitei ki jingkynnoh la thung ia ka kynhun tohkit kaba ar ngut briew ba kin tohkit halor kitei ki jingkynnoh, kine ki ar ki long u Prof. D P Singh kum u shongknor ka kynhun tohkit bad Prof. Dilip Chandra Nath kumu dkhot.
Kane ka kynhun tohkit kaba ar ngut , kan tohkit halor kitei ki jingkynnoh bad ia ka kaiphot kin hap ban ai hapoh ka 15 sngi naduh bala pynmih ia kane ka hukum bala thung ia ka committee.
Kane ka kommittee kan ai jingmut ruh kumno ban leh ban pynbeit ia ki jingeh, la bthah ia ki bor jong ka skul bah ba kin ia treilang bad kane ka kynhun tohkit ha kane ka jingtohkit, ia kane ka hukum la pynmih da ka jingbthah na ki bor ba halor, ia kaba la soi da u D K Himanshu Under Secretary jong ka sorkar pdeng.
