Shillong, Iaiong 23: Ka jingmynjur ka NEIGRIHMS ia ka jingbthah sha ki Hospital jong ka Sorkar Pdeng:- Ka Sorkar India lyngba ka Ministry of Health and Family Welfare, Nirman Bhawan, New Delhi, ka la pynmih ia ka jingbthah sha ki Hospital jong ka Sorkar Pdeng/Medical Institution ha kaba ia dei bad ka jingthied ia ki dawai bad kiwei kiwei da ki nongpang kiba duk.
Kane ka jingbthah ka ong “La wanrah sha ka jingtip jong kane ka Ministry na ka por sha ka por ba ki nongpang kiba duk, kiba pang bampong bad kiwei kiwei ki jingpang ba shyrkhei bad kiba ioh jingsumar ha All India Institute of Medical Sciences (AIIMS) bad kiwei pat ki Hospital jong ka Sorkar Pdeng kiba don ha kylleng ka ri, la kynnoh ba ki nongpyniaid jong ki hospital ki ai jingmut ban thied ia ki dawai na ki nongkhaii shimet, bad ia kane la ai jingbit hi da ki nongpyniaid jong ki hospital.
Ha kane ka phang, la wanrah sha ka jingtip sha baroh ba khnang ban pynlong ia ka jingsumar kaba lah ban kot bor da baroh, ka Sorkar Pdeng ka la shim ia ki lad ki lynti kynthup ia ka jingplie ia ka AMRIT pharmacy bad Jan Aushadi Stores ha bun ki hospital/institution kiba hapoh ka Sorkar Pdeng ha Delhi bad shabar ka Delhi.
La bthah hangne ia baroh ki hospital jong ka Sorkar Pdeng ki jaka sumar ba dei jong ka sorkar ba kin batai bha ia ki nongpang kiba duk ban pyndonkam ia kine ki jaka die dawai jong ka Sorkar kiba kham duna dor kum ka Jan Aushadi Pharmacy bad ka AMRIT Store kaba don hapoh ki hospital.
Kane ka long ba khnang ba ki nongpang kiba duk kin ym donkam ba shah iuhroit da kaba teng teng ki hap ban siew arshah ia ka dor jong kijuh ki dawai na ki nongkhaii shimet na iew na hat. Ban kot sha kane ka thong, lah ban ai ia ka jingpyntip paidbah ha ki hospital/institution khnang ba kan don ka jingtip bad jingsngewthuh hapdeng ki nongpang bad ki bahaiing ha sem jong ki.”
Katkum ka jingbthah jong Ka Sorkar India lyngba ka Ministry of Health and Family Welfare, la pyntip lyngba kane ka kyrwoah sha ki nongpang kiba wan shah sumar ha NEIGRIHMS ba ka NEIGRIHMS ka la seng ia ka AMRIT Pharmacy ha ka mala ba hapoh hajan ka Orthopedics OPD ha kaba ki nongpang ki lah ban ioh ia ki dawai bad kiwei kiwei ha ka dor kaba kham duna, bad ia ki tiar kiba rem kum ki cardiac stent, pacemaker.
Ki dawai bampong bad kiwei kiwei, lada ym don, ki nongpang ki lah ban buh ia ka jingdawa jong ki ha ka pharmacy bad ka AMRIT pharmacy ka la pynthikna ia ki nongpyniaid jong ka NEIGRIHMS ban pynioh ia ki ha ka 48 kynta. La bthah ia baroh ki nongpang kiba don ha NEIGRIHMS ban shim ia kane ka kabu ban ioh ha ka dor kaba bit na ka AMRIT Pharmacy kaba don hapoh ka NEIGRIHMS hospital.
