Shillong, Jylliew 29: U myntri synbut rangbah u Bah Prestone Tynsong mynta ka sngi u la kot ia ka jingialang hapoh ophis jong u Deputy Commissioner jong ka East Khasi Hills District ban ia kren ha kaba ia dei bad ka jingpyntrei kam ia ki skhim jong ka sorkar hapoh jong ka East Khasi Hills District ha kaba ma u long u Chairman,
Ha ka jingkren jong u Bah Prestone u la ong ba ka sorkar kala rai ban pynlong ia kum kine ki jingialang man ka shisien lai bnai ban bu dien ia ki skhim kiba ka sorkar ka pyntrei, kane ka jingiakynduh ka long ban ia mit jingmut ban sngewthuh bad ban weng ia ki jingeh lada ki don bad ha ka juh ka por ban ia ai jingmut ha kaba pyniaid ia ki kam sha khmat.
U la kyntu ia baroh ki ophisar kiba don ha ka kam ha kaba pyntrei kam ia ki skhim na ka bynta ka jingmyntoi jong u paidbah ba kin long kiba don ia ka jingkit khlieh ia ka kam bad kin shim ia ka kam da ka jingsngewthuh bad ban peit ia ki kam baroh kin long kiba iaid beit ha kaba pyntrei kam ia ki skhim pynroi jong ka sorkar.
Ki skhim kiba la ia kren ha kane ka jingialang ki long, ka MGNERGA,PMAY, NSAP, SSA, Mid Day Meal, ICDS, NHM,NRDWP,TSC, Swachh Bharat Mission, PMGSY, AIBP, PMKSY bad RKVY. Ha kane ka jingialang ia ia mir jingmut bad kala don ruh ka jingiai jingmut kumno ban pyniaid ia ki kam pynroi jong ka sorkar sha khmat na ka bynta ka jingmyntoi jong u paidbah.
