Shillong. Lber 01: La sdang ka jingianiew vote mynta ka sngi naduh 8 am.Hapoh 10 am ei ei,la lah ban tip lut mano ba jop bad mano ba rem bad mar karno seat ki party kin ia ioh.Ka jingiakren ban ia thaw sorkar ruh ka la iaid lypa shaid shaid sha khmat.
Hynrei,kaba i ma bad ishyrkhei eh ka long ka jingwan tuklar bad mushia palat ki briew kiba na bar ka jylla jongngi ban shu khein bein khein dew thala ne niew poh(take for granted) ban thaw sorkar(bulldozed) katkum ka jingkwah ne jingangnud jongki.
Kane ka la long lypa ka jingma bad ka jingshyrkhei kaba khraw kaba ap lypa ia ka ri bad ka jaitbynriew jongngi ha ka synshar ka khadar. Ha ki por mynshwa,ki party kiba don ha ka liang synshar ha Delhi ne na Assam kim ju nud saham satia ne kim ju nud ban batai stad lypa ia ka jingiathaw sorkar hangne ha Meghalaya.
Ki ap bad tieng burom shi katdei eh ia ki nongialam na Meghalaya khamtam ia ki nongialam ki seng trai Ri.Don ruh ki khep ba ki seng trai Ri ki pyrshang ban ia thaw sorkar hi tang para maki kum ka sorkar lai lama(APHLC,HSPDP, PDIC) ha u snem 1978.
Ki seng kiba nabar ki ju peit jaw dud iangi ha Meghalaya bad ki ju pyrshang ban thaw bun ki lad ki lynti kumno ban ioh pynpra ia ka sem jong ki party trai Ri.
Ki thong ba kongsan hi jongki kalong ban shu thong ne thied da ka pisa tang ban ioh thied ia ki MLA.Dei na kata ka daw ba mih kata ka khaii kulai ne horse trading.Ki jop iangi da kata ka buit ban pynngop ia ki MLA jongngi bad ki sa ioh ban synshar kein da kaba suk.
Kane ka raibi ka nang shyrkhei katba nangmih ki snem bad mynta pat ki la sdang ban khaii lypa wat shwa ban pynbna ia ka result elekshon ruh. U Chief Minister ka Assam,u Himanta Bishwa Sharma uba kham shalak bad sian buit bha u la dep ia kynduh bad u Conrad Sangma ban ia thaw buit (planned) lypa kumno ban ia thaw sorkar ha Meghalaya tang mar ia dep pynbna ia ka result MLA elekshon.
Ki la pyntikna lypa ban thaw sorkar tang bad ki paralok kiba don lang bad ka NEDA(NDA) kum ka NPP khnang ban ioh kylwait ia ka bor synshar katba mon.Ki nang ruh kumno ban pyntieng kohtympan lypa ba,khlem ka BJP, hana, ym lah satia ban thaw sorkar tang namar ba ka bat ia ka bor synshar ha Delhi.
Lada shu ia ngeit biej kumta,kata, ngi la shah teh mraw lypa ha ka BJP ha ka synshar ka khadar. Ha ka jingshisha,ka ri India ka dei ka ri synshar paidbah(democratic country).La pyniaid ia ka ri India katkum ka constitution jong ka ri India.
Ka don ka Finance Commission kaba peit ia ki kam pisa tyngka khlem shah shiliang khmat.Ka don ruh ka Niti Ayog ba ki khot mynshwa kum ka Planning Commission ban ia bhah lang ia ka roi ka par jong ki state.
Ki state sha south India bun kim donkam Congress ne BJP hynrei ki roi ki par hi kumjuh.Ka Orisha lei ki BJP ne Congress kim nud tur satia ba synshar hi ka BJD hangto.Tang ka North East jongngi kaba tieng iap tieng im ia ka BJP ne Congress na Delhi,na kata ka daw ki sdang ban shim kabu(take advantage) iangu katba mon.
Ka jingkyntu ia ki seng trai Ri kalong ba ki dei ban don ka bor ba laitluid(autonomy) khlem da shah teh shah khum ha ki bor pyniaid kiba na bar(outside forces).
Ym dei eh ban ong ‘Leh katba mon ha ri lajong’ kumba pyrta ki nong iaid procession pyrshah sorkar,hynrei ki dei ban kham tyngkan ka kwah bor ka kwah shuki khnang ban lait ka jingkhein jem khein poh kiwei iangi.
La phi rit bor la phi tlot kampher,ri bad bat ia la ka burom lajong namar ka jingkhlain kam shong eh ha ka jingbun paid hynrei ha ka mynsiem ba shynrang.Kiwei ki kynhun kidei ban burom iangi ha ri jongngi ym dei mangi ba ngin leit pynjem daw hakhmat kiwei pat.
