Shillong, Naiwieng 13: Mynta ka sngi ka Joint Action Committee kaba dei na ka thain Misei, Mawsmai, Langdongdai kiba don haduh 21 tylli ki shnong na kitei ki thian kila wan tur sha KHADC ban dawa ba ia kitei ki shnong dei banpynneh hapoh ka Mawsynrut MDC Konstitwensi yn ban phah sha Rambrai Konstitwensi.
Ki paidbah jong kitei ki 21 tylli ki shnong, hapoh ka JAC kila iaid kjat na Umsherpi ban poi sha KHADC bad kane kala wan rah ia ka jingkyndang ia ka khyndop jong ka KHADC hynrei ki nongtrei jong ka KHADC ki khlem ai lad ba kin ioh rung ha phyllaw ka KHADC.
Ka jingbym kwah ban leit sha Rambrai ka long ba ka dei na ka jingjngai palat kam don kano kano ka daw, ka jingjngai sha Rambrai ka long haduh 88 km katba sha Mawsynrut ka long tang 22 km dei na kane ka daw ki kwah ban don ha Mawshynrut.
La ong ba kiba poi sha kane ka jingiakhih mynta ka sngi dei tang ki rangbah shnong bad ki secretary na ki 21 tylli ki shnong bad kitei ki shnong ki hap ha ki lai tylli ki jaka thep vote Misei, Mawsmai, Langdongdai.
Ha dien na ka liang jong u Deputy CEM jong ka KHADC u bah PN Syiem la khot ia ki dkhot jong ka JAC ban ia kren bad ha kane ka jingiakren la ai ka jingkular ba ka KHADC kan peit bniah hakane ka dorkar tlang ban long ha u bnai Nohprah 2024 bad da kane ka jingklar kila pynkut noh ia ka jingiakhih na ka JAC.
