Shillong, Nohprah 15: Ka Meghalaya Peoples’ Human Rights Council (MPHRC), kum kawei na ki Seng kaba ïeng na ka bynta ban ïada ïa ka Hok Longbriew Manbriew ka la leit ban ïa shim bynta ha ka Jingpynsngew Paidbah kaba la pynlong da ka National Human Rights Commission (NHRC) New Delhi ha Nongbah Shillong.
Haba ïa shim bynta ha ka jingïathir ïatai halor ki kam kiba ju wanrah ïa ki jingshah thombor ïa ka Hok Longbriew Manbriew na ka liang ka MPHRC ka la ban jur ba ka NHRC ka dei ban pyntreikam katkum ki kyndon.
Ka MPHRC kala ai jingmut sha ka NHRC ka dei ban ithuh pura noh ïa ka jingpynbna ka United Nation halor ka hok jong ki riewlum kaba la tip kum ka “UN Declaration on the Rights of Indigenous Peoples” ne ka Dulir Jingpynbna-ïar ïa ki Hok jong ki Paid Trai Ri Trai Muluk kaba la dep pynskhem ha u snem 2007 ha ka Dorbar Bah ka Synjuk ki Ri bad kaba ka Sorkar India ruh ka la dep ban ai jingkyrshan pura ïa kane ka Dulir kiba long mynta ki bynta jong ka aiñ riti synshar jong ka ri synshar paidbah.
Ka NHRC ka dei ban pynsngew sha ka Sorkar India ïa ka jingdonkam ban ithuh pura noh ïa ka Ktien Khasi bad Garo bad ban pynrung noh ha ka Khyrnit kaba 8 (8th Schedule) jong ka aiñ riti synshar namar kawei na ki kyndon kaba la dep pruid dak ha ka UN Declaration on the Rights of Indigenous Peoples (UNDRIP) ne ka Dulir Jingpynbna-ïar ïa ki Hok jong ki Paid Trai Ri Trai Muluk la kren shai ba ki Paid Trai Ri Trai Muluk ki don ïa ka Hok Longbriew Manbriew ban ïoh ïa ka jingïada, ka jingithuh pura ïa la ka ktien ka thylliej katkum ka Aiñ.
Ka NHRC ka dei ban kyrpad mardor ïa ka Sorkar India ba ka dei ban weng bad pynduh noh mardor ïa ka Aiñ Ïakjakor kaba la tip kum ka Armed Forces Special Powers Act (AFSPA) kaba dan pyntreikam ha kiwei ki jylla jong Ka Dong Lam Mihngi (North East India).
Watla ïa kane ka Aiñ ka Sorkar India ka la dep ban pynduh pyndam na ka bynta ban pynjari ha ka jylla Meghalaya naduh u Bnai Ïaïong jong u snem 2018, hynrei ka jingma kaba ap pat lada pyntreikam biang, kane ka Aïñ ka ai bor ïa ki Bor Shipai ba ki lah ban pyndonkam bakla haduh ban shim wat ïa ka jingim briew ha ka kyrteng jong ka jingleh pyrshah ïa ka Aiñ Sorkar.
Ka NHRC ka dei ban kyrpad mardor ïa ka Sorkar India ba kan pynskhem noh shisyndon ïa UN Convention against Torture (UNCAT) bad ka Sorkar India ka dei ban wanrah ïa ka Draft Prevention Bill kaba la dep pynkhreh mynta la bun bun snem ha ka Ïing Dorbar jong ka Parliament kum ka mat ban ïatai bad ban pynlong aïñ pura noh ïa kane ka Bill khnang ba kan don ka jingïada bad ka jingkhang lad ïa ki bor Pulit ban pyndonkam bakla ïa la ka bor kum ki jingpynshitom jubor ïa ki briew kiba shah kem ha ka kti jong ki ha ka por ba set along ha ki thanat Pulit.
Kane ka long katkum ka jingthoh kaba la ai da u shongknor ka MPHRC mynta ka sngi sha u Justice Mahesh Mittal Kumar dkhot ka NHRC ha ka jingiakynduh bad ki seng bhalang ha kane ka nongbah Shillong mynta ka sngi.
