Shillong, Nohprah 21: U Chief Executive Member jong ka KHADC u bah Pyniaid Sing Syiem haba jubab ia ka jingkylli jong u bah Teinwell Dkhar MDC ka Shella ha kaba ia dei bad ka jingthmu ban pynkynriah ia ka ophis na katei ka jaka, la iathuh hapoh ka iing dorbar ba ka sorkar tyrwa ia ka jaka sha Mawpdang katba ki pan ha Mawdiangdiang.
Ka jaka kaba ka KHADC ka pan ka long ba ki ban ei na ka sorkar bad ka jingpan ka long ba ki don kam 20 akar ei ei ban shna ia ka ophis jong ka KHADC, la iathuh ba kane ka ba don mynta ka dong tang kumba 3 akar ei ei, la iathuh ba lada ioh jaka ia kane ka jaka kaba mynta kin pyndon kam ha kata ka rukom ban don ka jingmih pisa na ka bynta ka Konsil.
Na ka liang ka Konsil kala thoh sha ka sorkar jylla la saw bnai ei ei mynta bad kala don ruh ka jingiakynduh la ar sien ia u myntri rangbah ka jylla u Conrad K Sangma bad ia u Symbut myntri Rangbah ba dei peit ia ki kam pynroi sor u bah Sniawbhlang Dhar, bad mynta kila trwa ia kawei ka jaka kaba ki dang hap ban leit peit.
Haba jubab ia kawei pat ka jingkylli kaba la wan rah da u bah Teinwell Dkhar u EM ba dei peit ia ki kam shna iing u bah Teiborlang Pathaw la ong ka EC kala dep ban thoh sha MHA ha Delhi ban ai jaka ban shna ia ka KHADC Bhavan ha Nongbah Delhi.
Haba iarap ban jubab ia kane ka jingkylli u CEM ka KHADC u bah Pyniaid u la ong ba ha dien ba ka MHA kala bthah ban thoh sha ka Ministry Tribal Affair, mynta la ar bnai kila de ban phah ia ka jingthoh sha u Arjun Munda myntri ba de peit bad kane ruh ki pan ei ia ka jaka bad ryngkat ka pisa ban tei ia ka iing ha Delhi.
Ka jingthmu ban don ia ka iing jong ka KHADC ha Delhi ka long ba lada don kam kan suk ia ki ban don ia ka jaka sah bad ha ka juh ka por kan long ka jingmyntoi na ka bynta ki briew jong ka Khasi Jaintia khamtam ia ki samla pule kane ka jingiakren ka dang iaid bad kin sa pyntip ruh sha ka sorkar jylla.
