Shillong, Naiwieng 12: U Bah Banteidor Lyngdoh myntri ka sorkar jylla mynta ka sngi u la shah pynkhamti ba uy long u president ba shipor jong ka party PDF bad u bah Ivanlumlang Marbaniang unshimti noh kum u Chairman ka party.
Haba kren ha ki lad pathai khubor mynta ka sngi u bah Ivanlumlang u la ong ba u la aiti noh ia ka kam president jong ka party ha u bah Banteidor Lyngdoh shipor katba ym pat ioh banjied ia u president papura jong ka party. Katba ia lade un shimti noh shipor kum u Chairman jong ka party.
La iathuh ba ka Central Executive Committee (CEC) jong ka party kala ia shong ha ka sngi nyngkong bad nga la shim ia ka rai ban aiti noh ia ka kam president sha u bah Banteidor Lyngdoh. La leh ia kane na ka bynta ban pynkhlain shuh shuh ia ka party ha ki sngi ban dang wan.
“Haba nga aiti ia kane ka kam sha u Bah Banteidor ka long da ka mon sngewbha na ka bynta ka jingbit jingbiang jong ka party ym na ka bynta ka jingmyntoi shimet, ha ka jingialang jong ka CEC la pynkhamti ha nga pat ia ka kam kum u chairman jong ka party” la ong u bah Marbaniang.
Kane ka jingaiti ia ka kam president sha u Bah Banteidor ka long na ka bynta ban pynkhlain shuh shuh ia ka party khlem da ap haduh ban da don ia kata ka general council jong ka party namar ngi ia trei na ka bynta ka bha ka miat jong ka party.
Na ka liang jong u bah Banteidor u la ong ba u bah Ivanlumlang u la pynpaw ba u kwah ban iehnoh ia ka kam president jong ka party bad ha ka jingialang la pynkup shipor kum u president bad u bah ivanlumlang kum u Chairman jong ka party na ka bynta ka jingpynkhreh ia ka ilekshon MLA 2023.
Haba ia dei bad ka kam Chairman hapoh jong ka party, u bah Banteidor u la ong ba kane ka dei kaba la don hapoh jong ka riti synshar jong ka party kam dei kaba la shu thaw. La iathuh ba ka general council jong ka party kan long la shem snem ban jied ia u president ba pura jong ka party.
Ka jingiapher hapdeng u Chairman bad u President ka long ba u Chairman u airap ia ka kam jong ka party hynrei ban shim ia ka rai hapoh jong ka party pat ka shong ha u President kane ka dei ka jingiapher hapdeng kitei ki ar tylli ki kam.
