Shillong, Naitung 12: Ka Shillong Lajong Football Club ka dap da ka jingkmen ban pynbna ba u Jose Carlos Rodriguez Hevia na Spain un sa shimti kum u Head Coach ba thymmai jong ka kynhun na bynta ka samoi lehkai 2024/25.
Ka jingshemphang jong u Jose Carlos ban sngewthuh ïa ka rukom lehkai haba peit katkum ka rekod, kan sa nang pynkhlaiñ shuh shuh ïa ka kynhun. U Jose Carlos u la wanphai biang bad ka klob hadien ka samoi ba seisoh ha kaba u la ïohrah ïa ka Shillong Premier League bad ruh ïa ka Meghalaya State League ha u snem 2019.
U Jose u don ruh ha u ïa ka UEFA pro license kum u coach bad u ba la ïaid lynti 25 snem ha ka kam coaching/management kaba la pynshemphang ïa u ha kiba bun ki liang. U la sdang ban shimti ïa ka kam Coach bad ki klob bapher bapher ha kylleng ka ri Spain.
U la shah jied ban long kum u Technical Advisor na bynta ka shlem ai jinghikai jong ka klob Arsenal, kaba la tip da ka Arsenal Soccer Schools ha India naduh u Naiwieng 2014 haduh u Naitung 2016 kaba ha Pune. Ha kane ka por, u la long ruh u dkhot jong ka klob ba ïalehkai ha ka Indian Super League, ka FC Pune City naduh u Rymphang 2015 haduh u Naitung 2016.
Hadien nangta, u la leit ban ïasoh bad ka klob I-League, ka Minerva Punjab naha ka samoi lehkai 2017 ha kaba u la shimti kam ha ka kyrdan ïalehkai ki junior bad ruh ka kynhun senior. U la ïoh ban ïatreilang bad shibun ki player kiba la ïoh mihkhmat ïa ka India ha ka FIFA Under17 World Cup kaba la long ha India ha u snem 2017.
U Jose u la ïoh ban shimti ïa ka kam bad ka Lajong ha ka samoi lehkai 2019/2020 kum u Technical Director, Coaching & Youth Development ha kaba u la lah ban btin lynti ïa ka kynhun ban ïohrah ar tylli ki trophy.
Hadien nangne, u la leit ban kynriah noh sha ka Mohammedan SC ha ka samoi 2020/21 kum u Head Coach. Khadduh eh, u la shimti kum u Coach ha Colombia ban long coach ïa ka Gobernación del Atlántico ha ka samoi 2022/23.
Ka jingaiti jong u ban pynkharoi ïa ka sap ïalehkai jong ki samla ka ïadei jingmut ryngkat bad ka jinglong jingman jong kane ka klob. Hadien ba la thung ïa u Jose Hevia ban shimti kum u Head Coach bathymmai jong ka klob, u Bah Bobby L Nongbet mynta un shim ïa ka bynta kum u Khlieh nongpynïaid ban pynroi ïa ka sap lehkai ki khynnah samla jong ka klob (Youth Development).
Na ka liang jong ka klob ka ai khublei ruh ïa u Coach Bobby ïa ka jingpyrshang jong u kum u Head Coach ban kyntiew biang ïa ka klob sha ka kyrdan ïalehkai klob ba kham heh ha India bad ruh ban btin lynti ïa ka kynhun haduh kaba kut jong ka samoi 2023–24 jong ka lympung I-League. Ka ai khublei ruh ïa ka tnat Sports jong ka Sorkar jylla na bynta ka jingkyrshan kaba ki la ai ha ka por ba u long kum u Head Coach.
