Shillong, Naitung 04: U Bah HS Shylla Chief Executive Member (CEM) jong ka KHADC ha ka jingkren ka jong u ha ka jingialang hapoh Shillong College kaba la pynbeit da ka Khasi Author’s Society (KAS) kaba dei shibynta jong ka jingiakhih ia ksaid ban pynrung ia ka ktien khsai sha ka khyrngit kaba phra jong ka Ri Riti Shynshar jong ka Ri India, u la ong ba ka KHADC kan sa pass ia ka resolution hapoh ka iing dorbar ban phah sha ka sorkar halor kane ka jingdawa.
Haba kren ha kane ka jingialang kum u symbut kongsan, u Bah Shylla u la ong ba kaei kaba ka KHADC ka Pass ia ka Bill ha kine ki sngi ka long katkum ka Riti Shynshar jong ka Ri India hapoh ka Article 29 jong ka Klos (I) kaba la ai bor ia kino kino ki jaidbynriew kiba shong ba sah hapoh ka Ri India kiba don ia ka riti dustur, ka ktien kaba ki kren ki don ka hok ban iada.
Na ka liang jong u CEM ka KHADC, u la iathuh ha kane ka jingialang ba u Lat jong ka jylla u sdang ban phah ia kane ka Bill hapoh jong ka Home Ministry jong ka sorkar pdeng, halor kane ka jingpynrkhat jong u Lat u bah Shylla u la ong ba u Lat u dei ban ai ia ka jingmynjur ia kane ka Bill. Na ka liang jong ka KHADC kan sa ia kren bad ka sorkar hapoh jong ka Law Department ba dei ban ai ia ka jingmynjur ia kane ka Bill.
Ban pynneh pynsah ia ka jaidbynriew ki don lai tylli ki Mawbyrsiew bad kita ki Mawbyrsiew ki dei, ka “Khyndew, ka kheinkur khein kha bad ka ktien” la ong khlem ka khyndew, ha ei kin shong ki briew ban ioh ban ia khienkur khienkha, khlem ka ktien, kumno yn ia kren kumta kine lai ki pynieng bad pynskhem ia ka jaidbynriew.
U la ong ba ki long shuwa ki don ia ka mynsiem kaba junsur kila lai laitluid ha ka shnong kha shongman, ka jinglaitluid kala ialam sha ka laitlan bad mynta kala poi sha ka lyngkar. U la ong ba ka shongkha khlem ka don ka jingiadei bad ka ktien, dei na kane ka daw ba mynta kam don shuh kata ka jingsngew ban iait ia ka jaidbynriew, lada kim don ki sngewbhalang kane ka jingieit jaidbynriew kala duh.
U Bah Shylla u la ban jur ha kane ka jingialang ban kyntu ba ka long kaba don kam haduh katta katta ban ieit ia la ka jaidbynriew. Haba ka EC ka wan rah ia kane ka Khasi Hills Autonomous District (Khasi Social Custom of Lineage) Second Amendment Bill, 2018 hapoh ka iing dorbar baroh 28 ngut ki MDC ki ia tylli kawei ban ai ia ka jingmynjur.
Ha kane ka sngi u Bah Shylla u la ong, lada ia ki besien, ki mynsiang la ai jingiada ba tieng ioh ki duh jaidnoh, hato ymbit ban ai jingiada da ka ain iaki briew. Ha kane ka sngi u bah Shylla u la ong ruh ba kumno ka Chairperson jong ka Meghalaya State Women Commission ka Kong Thelin Phanbuh kan pyndon kam ia kane ka commission kum ka seng bhalang namar ka Commission ka dei kum ka jaka bishar ka don ia ka bor “quasi judicial Power”.
