Shillong, Nailar 17: U Bah Prestone Tynsong symbut myntri rangbah ka jylla mynta ka sngi u la leit sha ka shnong Rangthong ban ialap elekshon na ka bynta u kyrtong ka seng u Martin M Danggo ban kyrpad ia ki paidbah kane ka shnong ba kin ai biang ka jingkyrshan ia u kyrtong ka seng ha kane ka elekshon kaban long ha ka 23 tarik mynta u bnai hapoh jong ka 35-Ranikor Konstitwensi.
Haba kren kane ka jingialang paidbah u Bah Tynsong u la ong ba hapoh ka jingialam jong u Conrad kum u myntri rangbah, kum ka party kan kwah ban ia kdew kti iano iano hynrei ka wan sha u paidbah halor ka nongrim kaba ka party ka don ha kane ka elekshon katkum ka nongrim ba ka party ka don.
Haba kren halor ka jingkynnoh ha kawei na ki kot khubor ba u Martin M Danggo u la phet seng, u Bah Prestone u la pynshai ba hapoh ka riti synshar jong ka Ri India, u MLA haba u hiar shuki bad ia khun biang ia ka elekshon kumba la kynnoh kam dei ba u phet seng. U MLA barim jong ka Ranikor yn nym lah ban khot ba u dei u ba phet seng.
Halor ka jingkynnoh ba u Martin M Danggo u la leit sha ka NPP na ka bynta ban ioh ia ka Civil Sub Division, u Bah Prestone u la pynshai ha kane ka jingialang paidbah ba u MLA barim jong ka Ranikor u la len lade na ka bynta ka jingmyntoi jong u paidbah ka Ranikor Konstitwensi.
U Bah Prestone u la ong ba ki liang pyrshah ha ka elekshon 2013 kila ong ba dei ban pynrem ia u Martin M Danggo namar bay m lah ban pynioh ia ka Ranikor Civil Sub Division, hynrei mynta kine ki juh ki briew ha dien ba la ioh ia ka Civil Sub Division ki ong ba ka jinghiar shuki jong u MLA barim ka kala wanrah ka jingeh ia ki paidbah. U Bah Prestone u la ong ba ka jingioh ia ka Civil Sub Division ka dei ka jingkyrkhu ia ki paidbah ka ha kaba ki kam jong ka sorkar kila kham jan sha u paidbah.
Ha kane ka sngi u Bah Prestone u la ong ruh ba kane ka sorkar hapoh ka jingialam jong u Conrad K Sangma kala don bun ki skhim kiba kala pynkhreh na ka bynta ka jingmyntoi jong ki paidbah, ha ka liang jong ka surok kaba kynthup ia ka SARDP bad ia ki iew ha khappud.
Ha ka jingkren jong u MLA barim jong ka Ranikor u Martin M Danggo ba dei kyrtong ka NPP u la pynkynmaw ia ki jingialeh ban pynioh ia ka Ranikor Civil Sub Division, naduh ka por ba u dang don ha ka seng Congress ha kaba u Dr DD Lapang u la ong u myntri rangbah, ha ka por jong u Dr Mukul Sangma ba u long u myntri rangbah ka jylla.
Hapdeng ki dorkhas kaba kila ai bad ka jingkyrpad ia kitei ki myntri rangbah ba rim ka jylla, kila kyntait ban ai ia ka Civil Sub Division na ka bynta ki paidbah ka Ranikor Konstitwensi, hynrei mar leit ia kynduh ia u myntri rangbah ba mynta u Cornad k Sangma u la shim ba kane ka jingdawa ka long kaba dei hok bad u la ong ba mynta u snem un ai ia ka Ranikor Civil Sub Division.
U Martin M Danggo u la ong ba u hiar na ka shuki MLA kum ka dak jong ka jingburom ia u myntri rangbah u Conrad K Sangma bad ia ka seng NPP kaba la lah ban pynioh ia kane ka kam pynroi ha kane ka thain bad ha ka jylla baroh kawei. Ha kane ka jingialang paidbah la don lang u President jong ka NPP u Dr WR Kharlukhi, u myntri ba dei peit ia ki kam karkhana u Bah Sniangbhalang Dhar, MLA ka Williamnagar u Marcuise N. Marak, Mawshynrut MLA Gigur Myrthong bad u MDC ka Sohryngkham Pyniaid S. Syiem.
