Shillong, Naiwieng 09: Ka shad niam kaba la tip kum ka Shad Nongkrem kaba shisien shisnem kala kut mynta ka sngi ha kaba da ki spah ngut ki rang bad ki thei samla napoh ka Hima bad na bar ka hima ha ryngkat ki khun syiem kila ia shim bynta lang ha kane ka shad ba juh pynlong shisien shisnem.
Mynta u snem u myntri rangbah ka jylla u Conrad K Sangma, u Lamphang ka iing dorbar thawain ka jylla u bah Metbah Lyngdoh, kila don lang ha kane ka shad mynta ka sngi, ha ka jingialang long u bah Pyniaid Sing Syiem MLA ka Maryngkneng.
Ha kane ka sngi u myntri rangbah ka jylla u la ai ia ka jingmang pisa shiklur na kaba la man gar kur, kane ka jingmang pisa ka long ban pynbha ia katei ka jaka shad bad sawdong katei ka iingsad. Na ka liang u myntri rangbah u ai khublei kyrpang ia ki paidbah ban ioh ia ka snem kaba suk ba sian bad ban kiew ka ioh ka kot.
U myntri rangbah ka jylla u la ong ba kane ka dei ka riti dustur kaba kyrpang jong u khun khasi khara bad kane ka dew shai ka jingkhlain kum ka jaidbynreiw ban pynneh pynsha ia kaei kaba ki longshuwa kin la ai pateng.
Ha kane ka sngi ki paidbah na kylleng ka Ri Khasi Jaintia kila ia poi sha kane ka shad Nongkrem ban ia skhilang ia kane ka shad kaba juh long shisien shisnem, ha kane ka sngi u Syiem u kmie bad kiba khraw batri kila don lang.
