New Delhi, Kyllalyngkot 03: Mynta u snem 2024 u long u snem jong ki jingkylla ba kyrpang ba la sdang da ka Tnad Kam Pohiing jong ka sorkar pdeng ban pynthikna ka ‘jingsuk ban ioh ia ka hok ia baroh’ bad ban tei ia ka Bharat kaba shngain kumba la thmu da u Myntri Rangbah duh Narendra Modi.
Ka Tnad ka la shim shibun ki rai, kaba la prat lynti na ka bynta ki jingkylla kiba heh bad ki jingjop ha ka jingpynioh ia ka hok jong ki nongshong shnong ka ri kumba la pynneh pynsah ha ka Riti Synshar jong ka ri.
Ha ka jingbud ia ka jingkyrpad jong u Myntri Rangbah duh Narendra Modi ban pyndam ia baroh ki dak kiba sah jong ka jingsynshar ki nongwei, ka tnad kala rai ban bujli ia ka Indian Penal Code.
Ka Code of Criminal Procedure, bad ka Indian Evidence Act ba la pyntreikam da ka Parliament jong ka ri Bilat ha ka por jong ka jingsynshar jong ki da ka Bharatiya Nyay Sanhita, ka Bharatiya Nagarik Suraksha Sanhita, bad ka Bharatiya Sakshya Adhiniyam.
Ki ain ba iadei bad ki kam beain ba la saindur da kaba bat ia ki nongrim jong ki rukom treikam tynrai kiba don ha ki jingthoh ba hyndai jong ka India bad pynthikna ka jingai ia ka hok ha ka kam bisharia ki kam beain ha ka sien ba nyngkong hadien ba la ioh ia ka jinglaitluid. Ki ain ba thymmai ki la treikam ha ka 1 tarik Naitung, 2024.
Hynrei, kane kam pat dei baroh. Ka MHA ka la sdang ia ki sienjam wanrah jingkylla ha ka jingshngain, ka hok jong ki longkmie, ka jingkynthup ia ki briew kiba duna ka ioh ka kot, bad ka jingjam shaphrang ka jingiaid lynti ka Bharat sha ka por ba thymmai jong ka jingkhraw da bun bun shah.
