Shillong, Naiwieng 06: U Vice Chancellor ka North Eastern Hill University (NEHU) Prof PS Shukla ha ka sngi Balang ula kyntu ia ki samla pule bad ki Nongtrei ba kin pynsangeh noh ia ki jingiakhih jong ki haba pynpaw ba ka jingweng ia u Registrar, Deputy Registrar Academics, ka dei ka bym lah ban leh lyngba ka rai shimet lane ka mon ba shimet.
Kat kum ka jingong jong u, ka Sorkar ka lah ban rai ha kaban thung ia ka Inquiry Committee ban bishar ia ki jingdawa ban wengkam noh ia ki, lada ki suba ba don ka jingleh bymhok ha ka jingthungkam ia ki.
Ula kular ba ka eksamin thungkam ia ki nongtrei non-teaching staff kan sa sdang noh tang mar syn plie ia ka Ophis jong u Registrar, naba la khang ia ka na ka daw jong kane ka jingiakhih ba iaid mynta. Baroh ki kam ki jam hapoh NEHU kila sangeh lut hadien ka jingiakhih jong ki samla pule bad kumjuh ruh ka jingiakhih jong ki nongtrei non teaching staff.
Ki samla pule hapoh ka lama jong ka North Eastern Hill University Students’ Union (NEHUSU) bala kyrshan lang da ka KSU-NEHU Unit, kila pynlong ia ka jingshah thngan ba khlem pud bad khang khyrdep lut ia ka University kum ka dak ka jingpyrshah ia ka jingbym weng ia u Registrar, Deputy Registrar (Academics), Officer on Special Duty (Director, College Development Council) bad u Guest House In-charge.
Ki Nongtrei non-teaching staff hapoh ka lama jong ka NEHUNSA kila pynlong ia ka jingsangeh treikam ba lai sngi ban pynpaw ia ka jingpyrshah halor ka jingpynslem ban kyntiew kyrdan bad ban pynlong ia ka eksam thungkam ha ki kam bapher bapher kiba la pynbna laitkam naduh u bnai Naiwieng 2023.
Ha ka jingiakren bad ki lad pathai khubor ha Shillong Press Club u Prof Shukla ula ong “Ka jingweng ia u Registrar, Dy Registrar (Academics) kam dei kaba lah ban leh tang da ka rai jong uwei u briew ne ka mon shimet.
Kine ki Ophisar ki dei kiba la thung hadien ka jingbishar bad ki Interview. Ki kam jong ki bad ka jingshakri jong ki, ka iaid da ka lynti kat kumki kyndon ym da ka rai jong kano kano ka bor kynthup u Vice Chancellor”.
Haba pynpaw ba ki seng kum ka NEHUTA, NEHUNSA bad NEHUSU kila thoh sha ka Sorkar kynthup sha ka President ka Ri India, u VC ula ong “Lad aka Sorkar ka suba ba don ka jingleh bym hok, ka lah ban thung ia ka Inquiry Committee ban shong bishar ia ka kam.
Hynrei ia mynta, kam shym la don kano kano ka jingphah ktien na ka Ministry lane ka Ophis ka President sha ka Ophis u Vice Chancellor ba kren ia kane ka kam”.
Haba phai sha ka kam OSD (Director, College Development Council), u Prof Shukla ula ong “ Nga la kren ia kiba bun ki Professor ba kin shimti ia kine ki kam, hynrei ym shym la don ba treh satia”.
Ula kular “Nga dang kloi ban thung ia kino kino ki professor kiba kloi ban trei kum ki Director ka College Development Council bad ia ka Guest House Incharge, ka NEHU ka dang mad ia ka jingduna jong ki Nongtrei”.
Halor ka jingdawa ka NEHUNSA halor ka jingthungkam ia ki nongtrei, u Prof Shukla ula ong “Watla ka National Testing Agency (NTA) kala kyntait ban pynlong ia ka eksam thungkam hynrei ngi la khot tender ia kiwei ki Agency. Kila don bun ki Agency kiba kwah ia ka kam bad hadien ba plie ka Ophis u Registrar, ki file kin sa iaid noh sahkhmat”.
Halor ka jingdawa ban thung Pro VC ha baroh artylli ki campus ka NEHU-ha Shillong bad Tura, u VC ula kular ba un sa thung ia kine ki Pro VC hapoh u bnai Nohprah lada kam don kano kano ka jingaiktien na ka Sorkar Pdeng ban pynshai halor kane ka kam.
U VC ula pynpaw ba un sa khot iakren noh mardor ia ki samla ba iakhih bad ia ki nongtrei ha kaban iapynbeit ia ki jingdawa jong ki.
Halor ki jingdawa ba u dei ban hisar shuki noh, une u VC ula pynpaw ba um pat long satia uba kloi ban hiar shuki. “Ngam pat long uba kloi ban hiar shuki. Ia nga la thungkam da ka President ka Ri India. Ngan bud beit ia ki rai ki ban sa shim da ka President ka Ri India” ula ong.
