Shillong, Risaw 22: Ka North-Eastern Hill University (NEHU) mynta ka sngi ka 22 tarik u Risaw 2024 ka la pynlong ia ka jingiasoi soskular (MoUs) bad ki hynniew tylli ki company ba pawnam jong ka ri bad ka pyrthei. Ïa kane ka jingïasoi ïa ka MoU, kaba la long ha NEHU’s Shillong Campus, la ia don lang da u Director ka IIM Shillong, u Prof. D.P. Goyal kum u Kongsan.
Ki jingiateh la khmih lynti ba kin pynbha ia ka jingiatreilang ha ki bynta kum ka pule puthi, ka jingwad bniah, ka rep ka riang, ka teknoloji, ka jingia kylliang ha ka lariti bad ka jingpynneh pynsah ia ka lariti.
Haba kren ha kane ka sngi, u Vice-Chancellor ka NEHU, u Prof P S Shukla U la ban jur ba kine ki jingïatreilang ki ïahap bad ka thong ba kongsan jong ka NEHU ban “pynphriang bad kyntiew ïa ka jingtip bad ban noh synñiang sha ka jingkiew ha ka liang ka jingstad, ka jingpule, bad ka kolshor jong ka thaiñ Shatei Lam Mihngi.”
Kawei na ki jingïatreilang ba kongsan ka long bad ka Indo-Korea Business Cultural Centre (IKBCC), ka ban pynrung ïa ki jinghikai shaphang ka ktien Korea ha NEHU, kaba ailad ïa ki samla pule ha ka liang ka ktien bad ka kolshor.
U Prof. Shukla u la batai ba kane ka jingïatreilang kan “pynskhem ïa ka jingïadei hapdeng ka India bad ka Korea bad kan ailad ïa ki samla pule jong ngi ban ïoh ban leit jnoh ia kolshor jong ka Asia Mihngi lyngba ka jingïakylliang kolshor bad ki lad kamai.”
Kawei pat ka MoU la ïasoi bad ka ICAR – Agricultural Technology Application Research Institute, Guwahati. Kane ka jingiatreilang ka pynleit jingmut ha ka jingwad bniah lang bad ka jingpynroi ia ka bor, da ka thong ba iadei ban thaw ia ki lad ki lynti kiba thymmai ha ka rep ka riang bad ka jingpynroi ia ki nongkyndong.
U Prof. Shukla u la pynpaw ba “ryngkat, ngi thmu ban ai jingmyntoi ïa ka thaiñ bad ka ri da kaba pynroi ïa ka jingseng kam seng jam bad ban ïasam ïa ka teknoloji.”
Ka jingiatreilang jong ka CSRBOX Foundation (SMEC Trust) kan ai ia ki samla pule jong ka NEHU ban ioh ia ki jingtbit kiba iadei bad ka karkhana, ki prokram ba la pynskhem da ka IBM khlem jingsiew, bad ki lad ioh kam ioh jam.
U Prof. Shukla u la ban jur ba kane ka jingthmu “kan pynthikna ba ki samla pule jong ngi kin long kiba la pynkhreh na ka bynta ka iew treikam kaba nang kiew.”
Ka NEHU ka dang pyniar ruh ia ka jingshemphang jong ka ha ka kam ak phlim bad kam pynbyrngia lyngba ka jingiateh kular bad ka Black Screen Studio Inc., Mumbai.
Kane ka jingiatreilang kan thaw ia ki lad kamai ha ka jingshna phlim, ka jingiathuhkhana, bad kiwei kiwei ki bynta kiba iadei, da kaba pyndonkam ia ki jingtei jong ka NEHU bad ka jingtbit jong ka studio ha ka jingthaw phlim. “Kane ka jingiatreilang kan ailad ia ki samla pule jong ngi ban wad ia ki lad ki lynti kiba sngewtynnad ha ka kam ak phlim”, la ong u Prof. Shukla.
Ha ka jingiatreilang bad ka State Cancer Institute, Gauhati Medical College, ka NEHU kan iashim bynta lang ha ka jingwad bniah ia ka jingpang cancer bad kan ai ki lad jinghikai ia ki samla pule bad ki nonghikai. Ula ong ruh ba ngin noh synniang sha ka jingsngewthuh bad ban weng ïa ki jingeh kiba kongsan ha ka koit ka khiah.”
Ka NEHU ka shim ruh ia ka sienjam ban pynneh pynsah da ka jingiatreilang jong ka bad ka JETS 24×7, Shillong, ka ban wanrah ia ka jingshakri da ki E-Scooter bad E-Rikshaw hapoh ka jaka pule.
“Kane ka jingthmu ban ïadei bad ka mariang kan pynduna ïa ka jingpynmih carbon jong ki kali bad kan long kum ka nuksa na ka bynta ka jingkit jingbah kaba khuid bad kaba biang,” la kdew u Prof. Shukla.
Ka jingïatreilang jong ka skulbah bad ka TeamLease EdTech, Mumbai, ka thmu ban pyndap ïa ka jingïapher hapdeng ka jingpule ha ki kamra klas bad ki jingdonkam ha ka karkhana lyngba ka jingpyntbit bad ka jinghikai digital. “Da ka rynsan jong ka TeamLease EdTech, ngin pynkup bor ïa ki samla pule jong ngi ban leh bha ha ki kam kiba ïakhun,” ong u Prof.
Ha ka jingkren pynkut jong u, u Prof. Shukla u la ban jur ïa ka jingdonkam jong kine ki jingïatreilang ha kaba pynriewspah ïa ka imlang sahlang jong ki nongpule jong ka NEHU bad ban ai jingmyntoi ïa ka imlang sahlang kaba kham heh.
“Kine ki jingiatreilang ki pyni ia ka jingangnud lang jong ngi ha ka jingpynwandur, ka jingpynneh pynsah, ka jingnang jingstad, bad ka jingktah ha ka imlang sahlang,” u la ong .
