Shillong, Nialar 25: Mynta ka sngi ka seng HITO jong ka East Jaintia Hills District mynta ka sngi kala ujor da ka ejahar ha Lumshnong Policer Station pyrshah ia kito kiba pyrta “Maro maro” kumba la paw ha ki lat pathai khubor.
Ha ka ejahar kaba la soi da u President ka seng HITO East Jaintia Hills u bah Deibormi Rymbai bad u secretary u bah Burom Dkhar ba ha ka 24/8/2023 la pynlong ia ka jingsngap paidbah ha ka jaka jong ka Meghalaya Cement Limited ha Thangskai ha kaba la bthah ia kito kiba don bynta ban ia don ha kane ka jingsngap paidbah.
Ha katei ka sngi la iohi ba bun ki kynhun, ki paidbah khambun dei ki bym dei ki trai jylla la kdew ka HITO ha ka ejahar bad kila iakhih pyrshah da kaba kila pyrta bad khlem sngap shuh ia ki briew jong ka sorkar bad ia ki pulit kiba don ha katei ka jaka ban tem ia ka jingiaklumar wat la kam don kano kano ka jingpynshrai hynrei kala wanrah ia ka jingialeh pyrshah hapdeng ki pulit bad ki riew paidbah.
Kumba kala paw na ki vidoe kiba la pynmih ha ki lat pathai khubor la iohi shai ba ki briew kila pyrta, bom bom bad kren ia ki ktien khlem akor bad kila pynshit bad kane kala pynlong ban mih ka jingklumar pyrshah ia ki pulit bad ia ki bor ba dei peit ia ka District. Ka seng ka kyntu ban leh ei ei iaki ba don kti katkum ki kyndon ka ain.
