Shillong, Iaiong 17: Ka JSU Shillong Circle kala leit ban ai da ka ajahar pyrshah ia ki number jong ki riewshim ka
bu kiba thok ia u paidbah ban ai scheme sha ki paidbah kum ha kane por ba ki riew paidbah ki shem shitom na ka pakhang shnong.
Ka seng ka lah leit ai ia ka shithi ejahar pyrshah ia u number 8932756767 sha ki pulit jong ka Sordar Police Station ha Shillong ,ha dien ba ka seng ka lah ioh ka jing ujor na ki paidbah ba lah don ki riewshim kabu kiba lah phone sha ki bad kine ki riewshim kabu ki lah phone da kaba pynbiej ia ki paidbah ba kin ioh jingmyntoi na ki scheme bapher bapher jong ka sorkar pdeng.
Ki skhim kiba la tyrwa sha ki paidbah ki long kum ka Pradhan Mantri Awas Yojna bad ruh ban pynlait iaki briew na ka ram ka shah ba 3 bnai ha Bank namar ka lockdown. Ki riewshim kabu ki lah ong ha shuwa ba phin ioh ia kine ki lad jingmyntoi phin hap ban siew shuwa khyndiat sha ki ban ioh pyllait ia kata ka scheme.
Kine ki riewshim kabu ki lah phone bad ki lah pan ia ki ATM card number bad ki Account number jong ki briew. Ka riewshim kabu ki phone khnang ha kum kane ka por ba ki paidbah ki shem jing jynjar namar ka pakhang shnong kaba jlan (lockdown) ba ki paidbah ba lui lui kin ngop ha ka kti jong ki.
Ka seng lyngba u President ka Shillong Circle bad ki dkhot ki lah leit ai da ka ejahar ia u une u number u ba phone bad lah track ruh na u truecaller ba kidei na West, Uttar Pradesh bad ki ong pat ialade ba ki don ha Mumbai hapoh ophis treikam ka jong ki.
U samla Treiborlang R Suchen u lah ong ba ka seng hi ka sngewkhia ia ka jingshah shim kabu ki riew paidbah kiba lui lui bad ka seng ka kwah ban phah ia ka khubor kaba shai sha ki paidbah ba kim dei ban ngop ha kum kine ki phone call jong ki riewshim kabu.
Ka JSU ka kyntu ia ki paidbah ba kim dei hi ruh ban ai ia ki Bank account number,ATM number bad u CVV code bad Pan Number namar kine ki briew ki lah ban sei tuh ia ki pisa lyngba ki kor ki bor komputor ne ki jingstad thok kiba mynta.
Ka JSU ka pyntip ruh sha ki paidbah ba kine ki briew ki lah ban phone da shi bun tylli ki phone number bad ki paidbah kidei ban ujor ia ki sha ki Police Station kiba ha jan bad ki pulit kin lah ban leh ia kiba don kam ban thwet ia kine ki riew shim kabu.
