Shillong, Nohprah 23: Ka Employment bad Monitoring Cell ka KSU North Khasi Hills District ha ka jingialam u Samla Banjop Maring Kum u Chairman bad ki dkhot hynne ka sngi ka 23 Nohprah 2024 ka la leit ia kren bad u Dean ka College of Post Graduate Agricultural Centre halor ka jingpynkynriah ia ka jaka pynlong eksam na CAU, Umiam Meghalaya sha Guwahati.
Ki kam kiba lait ki long kum ka Lower Division Clerk(LDC), Upper Division Clerk (UDC) bad la Field Cum Laboratory Assistant (FCLA) ban long ha 3 bad 4 tarik u Kyllalyngkot, 2025 ia kaba ki samla pule ki hap ban leit thoh sha Assam.
Ka Jingleit mih jong ka Ka Employment bad Monitoring Cell ka KSU North Khasi Hills District ban ia kynduh ia u Dean katei ka CPGAS ka dei halor ka nongrim ba kumno ka tei ka shnat treikam ka don ia ka ophis hapoh ka jylla Meghalaya hynrei ka buh ia ki Examination Center shabar jylla ka ban long pynban kum ka jingpynduh mynsiem ia ki samla wadkam wad jam ha kaba long ruh kum ka jingkhanglad.
Ka Cell ka ieng skhem ruh ha ka nongrim ba balei kiwei ki jylla ki samla wadkam jong kitei ki jylla ki ioh ban thoh exam ha ka jylla lade jong ki katba ki samla pule napoh ka jylla Meghalaya ki hap ban leit shabar na ka jylla, Ka Cell da lei lei kam lah ban pdiang.
Namar ki Exam Centre la dep pynmih jingpynbna ba ki dei ban long ha College of Post Graduate Studies in Agricultural Sciences , Umiam, Meghalaya, College of Community Science, Tura, Meghalaya, College of Veterinary bad Animal Sciences, Selesih, Aizawl, Mizoram, College of Agricultural Engineering bad ka Post-Harvest Technology, Ranipool, Sikkim, College of Fisheries, Lembuchera, Tripura, College of Horticulture and Forestry, Pasighat, Arunachal Pradesh, phewse tang ia ka Examination centre na Meghalaya la rah sha Guwahati.
Kumta ka Seng mardor ka ia kren ba ki dei ban pynbeit noh khamkloi khnang ba kan long ka jingmyntoi ia ki Samla Wad kam wad jam ka Jylla Meghalaya. Ka Seng ka la pynsngew ruh ba eksam kadi offline bad kam shim don jingeh eiei ban pynlong ha Umiam namar ka jaka ka heh, hynrei kaba kynriah syndet ka pyn artatien ba ka don eiei sha lyndet.
Na ka liang jong ka Seng ka la maham jur ia une u Dean ba ym bit ban pynkynriah ia ka jaka pynlong eksam sha Guwahati namar kan long mawjynthut ia bun ngut ki samla ba wan na ka longiing ba duna ban leit thoh eksam shatei.
Shuh shuh la suba ruh ba u Dean u kwah ban pynkynriah ia ka jaka eksam sha Guwahati ban pynsuk ia katto katne ngut ki nong Assam ba ialeh ia kine ki eksam, kane ka long katkum ka kyrwoh kaba la phah da u samla James H. Mawphniang General Secretary KSU North Khasi Hills District.
