ShillongKa KSU EJHDU mynta ka 1 Tarik u Jymmang 2024 ka la buh ujor sha u DC pyrshah iaki kharkhana pynmih dew bilat halor ka jing bym pynmih iaki khubor thep kam (Advertisement) ha ki lad pathai khubor ha jylla(local newspapers) ba man la ka por.
Ka seng ka lap ba ki ba bun ki kam kiba lait ha kine ki kharkhana la pyllait iaki sha kiwei pat ki kot khubor sha kiwei pat ka jylla kum sha Bihar, Assam bad kiwei kiwei. Kane ka jingleh jong kine ki kharkhana ka pynbitar ia ka seng bad ka pyni ba kim burom bad kheiñ snep satia ia ki trai ri ha ka liang ka ioh kam ioh jam .
Ka jingleh jong kine ki kharkhana pynmih dew bilat ba don ha ka thaiñ East Jaintia hills district hi baroh kawei ka pyni shai ba ki kwah tang ban kjit ia ka spah mariang ka jong ngi khlem da sngewlem tang khyndiat ruh ia ki bapli ki samla jong ngi kiba la pyndep ia ki kyrdan pule bapher bapher bad kiba long tbit (Qualified) ban trei ha kata ka kam kaba dei hi ka laiñ pule jong ki.
Ka seng ka dawa na u DC bad la kyntu ba ki dei ban tuklar iakane ka kam bad kim dei ban iaid lait ban pynmih ia kano kano ka kam ha ki lad pathai khubor ka jylla.
Ka seng ha kane ka sngi ka la pynpaw ruh ba kan sa wanrah iaka job fair ha ka thaiñ East Jaintia ha kaba kine ki kharkhana kin hap ban thep kam iaki samla ka thaiñ ryngkat ka jingiatreilang bad ka bor district lada long kaba lah. Haba ia kren halor kane ka phang, u DC u la ong ba un ai da ka jingthoh sha baroh ki cement plant ba don hapoh district ban ia kren ia kane ka kam.