Shillong, Iaiong 02: Ka Synjuk ki Nongniah Taksi Sor bad Khapsor (SNTSKS) ha ka 2 tarik Ïaiong 2025 ka la wan iakynduh ia u Bah Winston Tony Lyngdoh u EM ba bat ia ka tnad Labour halor ka jingjyllei ki bar Jylla ba kamai sahuh khlem ki kot ki sla kiba biang.
Haba kren sha ki lad pathai khubor na ka liang u Bah S Rynjah Working President jong kane ka kynhun hadien ba la dep kynduh ia u EM , u la ong na ka liang u EM un sa shim khia bad na ka liang ka Synjuk ki nongniah taksi sor bad khap sor ki shaniah ha kane ka EC ba thymmai namar ha ka EC barim ba la leit noh ka la don ka jingchecking ia ki kot ki sla bad tang shisien hynrei mynta ki bar Jylla ki la sdang ban kamai biang khlem ki kot ki sla kiba biang.
Shuh shuh u la ong ka jingkamai Taksi ki bar Jylla ki la bun bha ha Nongbah Shillong bad ka kam niah taksi ka dei kawei na ki lad ioh kam ha ka pyrthei jynjar kam mynta bad ka jingdon ki bar Jylla ka pynduh kam ia ki khun samla jong ka Jylla. Kumta ka Seng ka kyrpad ia ka EC ba thymmai ba kan shimkhia ia kane ka mat bad ngeit ba ka EC thymmai jong ka KHADC kan shimkhia.
