Shillong, Lber 28: Ha u bnai Rymphang 2021 ki nongialam ka sorkar MDA ki la pynbna mar ia wan phai na nongbah Delhi ba u Amit Shah um kwah shuh ban ia kynduh ia ki nong Meghalaya ha Delhi hynrei u da kwah eh ban wan sah miet ar miet syndon ha Shillong khnang ban ioh ia kren hun bad ki nongialam ka sorkar MDA.
Ki MLA lem bad ki seng bhalang halor ka kam bah ILP, ka ktien Khasi ha ka 8th Schedule,nalor bun bah ki mat kiba ktah mationg ia ka jylla jongngi. Shi taiew ei ei mynta,ki nongialam ka sorkar MDA ki la sdang ban tap eit miaw ba ki la dep ban pynkynmaw biang ia u Amit Shah ia ka jingwan jongu sha Shillong ban pyni sha ki paidbah ba ki khlem lamler ia la ka ktien ne ka jubanlak ba ki khlei sha ki lad pathai khubor.
Hynrei,u Amit Shah um i patiaw ne um i salia ei ei satia ia ka sur ka sorkar MDA.Sa tang ar sngi une u bnai Lber u la kut noh.Mar ia kut u bnai Lber,sa kawei ka jingpynshai ki nongialam ka sorkar MDA kin sa pynbna shaphang ka jingwan, jingbym wan u Amit Shah sha Shillong lym kumta kin long ki nonglamler hakhmat u paidbah.Ki lah ban sa pynbna ba un wan pat hadien ba la pynbna ia ka redult MLA ha West Bengal bad Assam hadien ba la ioh thaw sorkar ka BJP ha kitei ki state.
Kata,kan long haduh u bnai May ei ei bad u lah ban sah taiew syndon sha Shillong namar ba u la kham laitluid bad kham ioh por syndon. Lada kim lah pynwan shisha ia u Amit Shah sha Shillong kumba ki la pyrshang thaw buit,ka pyni ba ka sorkar MDA kadei kaba shu khlein la thang bad jwat la bam.
Ka pyni ruh ba ka Delhi kam pat burom ne patiaw ei ei ia ki.Ki la kop hangne ha Meghalaya la kat ba kyrhuh u sing ne u khla hynrei hakhmat ka Delhi pat kim pat long wat tang kum i khnai rit ruh.Imat ka Delhi ruh ka la tip ia ka jingkylla rong bad kylla nongrim jongki ym tang ha ka ktien jongki hynrei kumjuh ruh ha ki kam jongki.
Ka ktien ki riewstad ka ju ong ba ka jingsarong ka wan hashwa ka jingjot (pride goes before destructiion).Haba la kyrni eh ka jingmlien ruh la eh ban bthat ia u kynjri jongka.Shisien ba u Blei u la mut ban pynjot, u da pynlamwir shwa ia u briew.
