Shillong, Jylliew 10: U heh duh jong ki shipai khyndew u General Pipin Rawat u la wan jngoh ia ka North East ia kaba la tip kum ki jaka kiba sha khmat, khamtam ha khappud bad ka Ri China ia kaba la peit ia ki khappud da ka kynhun shipai ia kaba la tip kum ka “Spears Corps”.
Ha kane ka jingwan jong u la synranlang bad u Lieutenant General Abhay Krishna, General Officer Commanding-in-Chief Eastern Command bad Lieutenant General Gopal R, General Officer Commanding jong ka kynhun shipai Spear Corps.
Ha kane ka jingwan ka jong u ne u heh duh jong ki shipai khyndew sha kane dong shatei lam mih ngi jong ka Ri India, u la leit jngoh ia ka Talsing ha Arunachal Pradesh ha kane ka jingleit ka jong u la batai ia u heh duh jong ki shipai khyndew ia ka jinglong jingman jong ka jaka.
Na ka liang jong u heh shipai u la ai ka jingiaroh ia ki shipai kiba la lah ban trei na ka bynta ban peit ia ka shong suk shong sain bad ha ka juh ka por la lah ban ai kam ia ki briew na katei ka jaka.
Kane ka kynhun shipai nalor ba ka dei ban peit ia ki pud ki sam ha ka jylla Arunachal Pradesh, kala hap ban shim ruh ia ka jingkit khlieh ban ia khun pyrshah ia ki lehnoh ha ki lai tylli ki jylla jong ka dong shatei lam mih ngi jong ka Ri India. Na ka liang jong u heh duh jong ki shipai u la iaroh ka jinglong kane ka ka kynhyun shipai kaba la khreh ban ia kynduh ia kino kino ki jingeh.
