Shillong, Nailar 26: Ha kine ki khyndiat sngi kala don ka jingiakynad ha khappud Meghalaya bad Assam ha ka shnong Lapangap ha kaba na baroh arliang na Meghalaya bad na Assam ki pulit kila don lang ban tem ia kano kano ka jingiakynad bad ki pulit ka jylla Assam kila shna da ka jaka sah ba shipor ha jan shnong.
Haba kren ha u SP News Agency ki nongshong shnong na Lapangap kila ioh ia ka jingtip ba ki pulit jong ka jylla Assam kila shna da ka jaka sah ba shipor hapoh u pud u sam jong ka shnong Lapangap, halor kane mynta ka sngi katto katne ngut ki riew paidbah bad ki pulit jong ka jylla Meghalaya kila leit ban tur sha jan ban pynshisha ia kata ka ktem ba shipor.
Haba ki pulit jong ka jylla Meghalaya bad katto katne ngut ki riew rangbah na ka shnong kila jan poi sha katei ka jaka ki paidbah na ka liang jong ka karbbi kiba la don ha jan ka ktem sah ba shipor kila kawang maw bad sait da ki jri.
Ba lait na ka jingiamynsaw ki riew rangbah na ka shnong bad ki pulit kila kynriah noh bad haba ki riew paidbah ka shnong Lapangap kila ioh ia kane ka jingtip kila ia mih paidbah ban tur sha katei ka jaka ha kaba ki Karbi kila phet noh na katei ka jaka.
Kane ka jingleh jong ki paidbah na Karbi kala pynbitar ia ki paidbah, kane ka jingleh ki pulit Assam ban ailad ia ki paidbah ruh ka long kaba bakla ha ka jingshisha ka jingdon jong ki pulit Assam ha khappud ka long ban tem ia ka jingiakynad.
