Shillong Jylliew 24:U Executive Member ba dei peit ia ka pla pisa ka Khasi Hills Autonomous District Council u bah Seiborlang Warbah mynta ka sngi u la wanrah ia ka mang tyngka hapoh ka iing dorbar na ka bynta u snem 2025-26 kaba pahuh da T 5,24,640/- tyngka .
U bah Seiborlang haba wanrah ia ka mang tyngka u la ong ban peit bniah ia ka jingpynlut kaba dei ban long barabor kaba adkar,wat la ka jingmang pynlut kaba la long baroh T. 227,48,35,620/- (Arspah arphew hynniew klur sawphew phra lak laiphew san hajar hynriew spah arphew tyngka).
Ka jingmang pisa ban pynmih ka long T.227,53,60,260/- (Arspah arphew hynniew klur sanphew lai lak hynriew phew hajar arspah hynriew phew tyngka) kum la pyni ha ka mang tyngka,katkum kane ka jingkhein kaba la wanrah hapoh ka iing dorbar ka kdew shai ba ka kham bun ka jingmih ban ia ka jinglut haba shim na kane ka jingkhein kane ka mang tyngka ka dei kaba pahuh.
Kane Ka mang tyngka ka kynthup lang ia ka mang tyngka kaba lai bnai kaba sdang naduh ka 1/Iaiong/2025 haduh ka 30/Jylliew/2025 ia kaba la dep pdiang da ka iing dorbar kaba long T.35,44,55,600/-(Laiphew san klur sawphew saw lak sanphew san hajar hynriew spah).
Ha ka jingkren haba wanrah ia ka mang tyngka, ki lad jingmih ka long kum na ka jingai jingbit ia ki trai khyndew ki ban bynda ia ki jaka jong ki ban shim ram na ki bank,ka jingmih na ki mar khlaw ka jingdie ia ki court fees ka khajna na ki iew na ki trading laisen, ka jingdie ia ki kot ki sla ba ki shon.
Ka jingioh na ka khajna ki mar poh khyndew ba la tip kum u major bad minor mynta u snem kan long T.21,71,82,907/- tyngka kaba ka KHADC ka dei ban ioh na ka sorkar ka khajna na ki kali ka khajna na ki kam ba trei, ka jingioh na ka 15th Finance Commission kaba dei ban ioh na ka sorkar jylla, kan don ruh ka kran kaba kin ioh na ka Grant-in-aid for protection of Tribal Land and Interest, ka jingioh na ki khyrdop bad na ka jingbit ba ki ai ban shna iing .
U Deputy Chairman uba pyniaid ia ka iing dorbar hadien bala wanrah ia ka mang tyngka da u bah Seiborlang u la bthah ia ki dkhot ka iing dorbar ba lada don kano kano ka jingthmu ban wanrah ia ka jingpynduna ha ki shnat treikam ki dei ban pynpoi da ki jingthoh sha u Secretary shwa ka 4 baje nohphai sngi mynta ka sngi.
