Shillong, Rymphang 25: Ha kane ka dorbar mang tyngka jong ka KHADC, ka Executive Committee jong u bah Titosstarwell Chyne kala wanrah saw tylli ki Bill hapoh ka iing dorbar mynta ka sngi ia kaba yn dang ia kren ia ki hapoh ka iing dorbar bad lada ka iing ka pdiang yn pass ia ki ha ka 3/3/2021 u bnai ban wan ka sngi kut jong kane ka dorbar mang tyngka.
U Chief Executive Member jong ka iing dorbar u bah Titosstarwell Chyne u la wanrah ia ka Khasi Hills Autonomous District (Regulation and Administration of Land) Bill, 2021, haba wanrah ia kane ka bill na ka liang u CEM u la ong ba shuwa ban wanrah ia ka u la dep phah ia ka sha baroh ki dkhot ka iing dorbar 20 sngi shuwa.
Haba wanrah ia kane ka Bill, u CEM u la ong ban a ki dkhot ka iing dorbar don tang u wei na pdeng ki dkhot kiba u la phah ia ka jingai jingmut, kiwei pat ki sngap jar, ka por ka dang don namar ia kane ka Bill yn pdiang hapoh ka iing dorbar ha ka 3/3/2021 ki dkhot ka iing dorbar ki dang lah ban ai jingmut.
Ka kong Grace Mary Kharpuri EM ba dei peit ia ki Iew, myntaka sngi kala wanrah iaka Khasi Hills Autonomous District Council( Establishment, Management and Control of Market) Bill, 2021, katkum kane ka Bill ka long ba baroh ki iew ki dei ban ioh ia ka jingithuh jong ka KHADC.
U Bah Jambor War EM ba dei peit iaki kam hima sima, u la wanrah ia ki ar tylli ki Bill, kawei ka Khasi Hills Autonomous District Council (Nomination and Election of the Syiem, Deputy Syiem and Electors of Nongstoin Syiemship) Bill, 2021, katkim kane ka Bill ka long ba ktien “Khar-rit” la weng noh bad pynrung noh da ka ktien ‘Nongkhar”.
Kawei pat kaba Bill kaba la wanrah hapoh ka iing dorbar mynta ka sngi ka dei ka Khasi Hills Autonomous District Council (Administration of Elaka) Bill 2021, katkum kane ka Bill ka long ba lada ka don ka jingiakjia hapdeng ki hima kin ujor sha u nongbishar ka KHADC, ym dei shuh sha u EM Elaka bad lada dei ki shnong kin ujor sha u Magistrate ka KHADC, ym dei shuh sha u Deputy secretary.
Ia kine ki Bill baroh kiba la wanrah mynta ka sngi hapoh iing dorbar kind ang ia kren ha ka sngi kut jong kane ka dorbar mang tyngka ban pdiang ia ki da ka iing dorbar jong ka KHADC.
