Shillong, Lber 05: U Myntri rangbah ka jylla u Conrad K Sangma ba bat ia ka tnad pla pisa mynta ka sngi u la wan rah ia ka mang tyngka jong u snem 2025-2026 ha ka jingduna pisa kaba T.1,970/- klur tyngka kaba mut ka dang dei tang 2.96% na ka 5.5% kaba la shah ia ka jylla ban shimram.
Katkum ka jingkhien kaba la ai da u myntri rangbah ka jylla ka jingioh ka jylla kan long tang T.25,627/- klur tyngka ha u snem mang tyngka 2025-2026, katba ka jingpynlut la antad ba kan kot sha ka T.27,597/- klur tyngka bad kane ka dei shai khlem da khien ia ka ram kaba ka sorkar ka dei ban ioh T. 4,788/- klur tyngka bad ia ka ram kaba dei ban siew T.2,406/- klur tyngka ka jingduna pisa kan long T.1,970/ klur tyngka.
Ka mang tyngka mynta u snem 2025-2026 kaba la wanrah da u myntri rangbah ka jylla la mang antad ba ka jingioh ka jylla kan long T.30,415/- klur tyngka ha kane ka snem mang tyngka, na kane ka jingmih na ki jingioh ka sorkar na ki bun ki khajna kan long T.25,591/- klur bad ka jingioh na ka jingshim ram, na ki jingia die ka long T.4,824/- klur tyngka lait noh na ka ram kaba ka jylla ka dei ban ioh T.4,788/- klur tyngka, ka jingioh ka jylla kan long T.25,627/- klur tyngka.
U myntri rangbah la ong ba ka jingantad ban pynlut ha kane ka snem mang tyngka kan long T.30.003/- klur tyngka, ha ka jinglut ha kaba pyntrei ia ki kam jong ka sorkar kan long T.20,556/- klur tyngka bad ka jinglut ha ka siew ia ka tulop bad ki jingsiew ia ka bai bam tynmen kan kot sha ka T.9,447/- klur tyngka kane khlempat khien ia ka ram ban siew kaba dei T.2,406/- klur tyngka, haba khien antad ka jinglut kan kot sha ka T.27,597/- klur tyngka.
Ha kane ka mang tyngka la wan rah ruh ka jingmang pisa kaba la ka jong na ka bynta ka jingiada ia ka mariang kaba la kot sha ka T.5,421/- klur tyngka ha kane ka snem 2025-2026 bad na ka bynta ki samla kan long T.6,219/- klur tyngka kane ka long ba la pynkiew ia ka jingmang pisa da 25%.
Ha kane ka mang tyngka mynta u snem 2025-2026 la wanrah ia ka skhim thymmai kaba la tip kum ka Chief Minister Scholarship Scheme, kane ka dei ka skhim kba thymmai ban ai baibam ia ki 80,000 ngut ki khynnah pule ba ka sorkar kan ai T.6000/- tyngka marwei.
Ha kane ka mang tyngka mynta u snem 2025-2026 kala don ka jingpynkiew ia ka jingmang pisa sha baroh ki tnad sorkar, bad kala don ruh ka jingkdew kaba shai ia kaba ki riew shimet kin wan ban bei pisa sha kane ka jylla Meghalaya.
Ban pynshlur ia ki kompnei ban san seng ia ki km IT ha kane ka jylla na ka bynta ki nongtrei kiba kin thung nyngkong 15000 ngut ka sorkar kan ai jingkyrshan T.3000/- tyngka ia u wei u wei u nongtrei na ka bynta lai snem.
