Shillong, Rymphang 25: U Chief executive member jong ka KHADC u bah Titosstarwell Chyne haba jubab ia ka jingkylli jong u bah Lamphrang Blah nongialam ka liang pyrshah ba la kwah ban tip hato ka KHADC ka don bynta ei ei kum ka kynhun ban leit ia kren halor ka Inner Line Permit, na ka liang jong u CEM u la jubab ba em.
Haba jubab ia ka jingkylli bynrap ba ka KHADC kala pdiang ia ka rai hapoh iing dorbar ban pyntrei kam ia ka ILP, haba ia dei bad kane ka rai la dep ban phah sha ka sorkar, haba ia dei bad ka jingwan u myntri kam poh iing sorkar pdeng u Amit Shah ha Shillong ha ki bnai ba la dep , la ong ba ka KHADC kam shym leit ia kynduh namar tang ai ai ia ka dorkhas kam don nongrim ban leit.
Haba juba pat ia ka kylli bynrap jong u bah P N Syiem, haba la kylli hato ka dei kaba shisha ba u myntri kam poh iing kumba la mih ha ki lat pathai khubor u la ong ba phi kwah ILP ne Sixth Schedule, haba jubab ia kane u CEM u la ong ba u dkhot ka iing dorbar u kren ia kaba mih ha kot khubor, ia kane un nym ban ong ei ei namar kam pat don ka jingiakren kaba kum katta.
Halor katei ka phang na ka liang jong ka sorkar ruh kala dep kren ban pynshai ba kam pat don kata ka jingiakren kaba kum katta, na ka liang jong u CEM u la kren shai kdar ba ka jingdawa ia ka Inner Line Permit ka long la ka jong bad ka Sixth Schedule ka long la ka jong um dei ban pyniakhleh lang.
La ong ba ka EC kan sa pan jingbit ban ia kynduh ia u myntri kam poh iing ka sorkar pdeng ha ka jingwan ka jong u ha u bnai Lber ban wan ba kin ioh ban ia kren halor kane ka phang ba don kam ia ka ILP ha kane ka jylla.
U Bah M N Mukhim EM ba dei peit ia ki kam pynroi haba jubab ia ka jignkylli u bah PN Syiem u la pyntip hapoh ka iing dorbar ba ka EC kala pdiang pdiang T.20,47,50,000/- tyngka na ka sorkar jylla bad kaba ki dang ia kren mynta ka long ia kaba dang sah 50% kaba ka sorkar jylla ka dang bat. Kane ka pisa ka wan ha ka 15th Finance Commission kaba ka KHADC ka dei ban ioh T.182 klur ia kaba ka sorkar pdeng kala pynlait T.91 klur.
Ha kawei pat ka jingkylli jong u bah PN Syiem, u CEM u la ong ba ka KHADC kala de ban ai ia ka NOC sha ka sorkar ban shna ia ka surok na Shillong Dawki bad kum ba ka long ka sorar kala dep ban ai sha ki kontraktor ban pyntrei ia kane ka surok.
Haba kawei pat ka jingkylli kaba la wanrah da u bah Fantin J Lakadong ha kaba ia dei bad ka High Level Committee, u CEM u la ong ba ka dei ka jingshishah ba u CEM jong ka KHADC dei dkhot jong ka HLC kaba la thaw da ka sorkar ha ka 8/08/2018 bad kaba sah mynta ka long sa ban ai ia ka kaiphot sha ka sorkar.
