Shillong, Risaw 06: Mynta ka sngi ki nonghikai kontrak kiba la shah weng kam ha kane ka sorkar MDA ha dien ba kila shong iakhih kyllain mungor shibnai lynter ha khmat dur mot jong Kiang Nangbah mynta ka sngi kila tur sha secretariat ban pynsngew sha ka sorkar ia ka jigndawa jong ki ban thungkam biang.
Ha kane ka jingiaid na jan Civil Hospital sha Secretariat ki pulit kila sdang ban khang lynti hynrei kila tur bad ha pdeng kane ka jingiatur ban khanglad ia ki nonghikai kiba la kyrshan ruh sha kiwei ki seng bhalang kila sait da ki “Tear Gas’ jingsiat pynsat khmat sha ki nonghikai.
Ha kane ka jingsiat jingpynsat khmat u nongialam ki nonghikai bala shah weng kam u bah Birbor Riangtam u la kyllon ha madan namar ba u tear gas u la hap ha jan jong u, kane ka jingleh jong ki pulit kala dang pynbitar bad ki nonghikai kim shym la kynran dien na kane ka jingiaid haduh ba kin da poi ha khyrdop jong ka secretariat.
Ha dien ka jingshah siat lyer pynsat khmat ki nonghkai kila ia pyrta ba kim dei ki lehnoh, dei ban pynshitom ia kito ki pulit kiba la siat lyer pynsatkhmat, kila ia pyrta ba kane ka jingiakhih jong ki ba ki dawa ia ka hok jong ki.
U bah PS Lygndoh u la ong ba u dawa na ka sorkar khamtam u myntri rangbah ka jylla ban ai ia ka jubab mynta ka sngi bad u bah Lahkmen Rymbui myntri ba dei peit ia ka tnad pule puhti ba un shim ka jingkit khlieh ban na ka bynta kito kiba mynsaw.
Shuwa ban leit tur sha Secretariat kala don ka jingkren paidbah ha jaka ba ki pynlong ia ka jingiakhih shnong kyllainmungor ha kaba la ioh ia ki nongkren na ki riew trei mon sngewbha bad ha kane ka jingleit tur sha secretariat ruh kila ia synran lang.
Haba kren ha ki lat pathai khubor wat hapdeng ka jingshitom ha khmat secretariat u bah Birbor Riangtam la ong ba ki nonghikai kontrak kiba la sah weng kam ki don tang kumba 800 ngut ei ei, ka jingkyllika long lada ha Assam la ithuh haduh 56000 ngut ki nonghikai kontrak bale ha Meghalaya ym lah.
Kane ka dei ka jingbam bein jong ka sorkar MDA ia ki nonghikai, ka sorkar kaba rim kala shim ia kaba bha tam, ki kyndon kila wan naduh ka snem 2010 bad ka sorkar kala pynlait im da kaba shim ia ki kyndonba ki nonghikai kin dei ban ioh 45% bad kiwei ki kyndon da kaba leh jai jai.
