Weng ka shnong Mawtap ia ka pakhang surok, ba shah biang ka PWD ban shna iaka lynti ïaid kjat

Shillong, Jylliew 19: Hadien ka jingpakhang surok kaba la neh baroh shi taiew da ka shnong Mawtap Pyllun, Sohiong ban pynpaw ka jingpyrshah ia ka PWD halor ka jingpyn-sangeh ia ka jingtrei ban shna ia ka lynti ïaid kjat da ka Mawtap Pyllun Village Employment Council (VEC), mynta ka sngi ka sngi ka shnong ka la weng noh ia kane ka jingpakhang surok hadien ba ka PWD kala shah biang ban beteng ban shna ia ka lynti iaid kjat.

Hadien bala ioh ia ka  jingmynjur biang na ka Ophis u Executive Engineer ka PWD Highway Division, Shillong ha ka sngi nyngkong, ki bor pyniaid shnong ka Mawtap Pyllun, Sohiong bad kiba la rung kyrteng ruh kum ki nongioh myntoi na ka skhim MGNREGS, ki samla shnong kynthei bad shynrang ki la mih paidbah mynta  ka step ban weng noh ia ka jingpakhang surok kaba ki la pynlong naduh ka 12 tarik u Jylliew.

Ban pynkynmaw  ka shnong baroh kawei ka la pynlong ka jingpakhang surok hadien ba ka tnad PWD ka la pynsangeh ia ka jingpyntrei ban shna ia ka ia ka lynti ïaid kjat ba la bei tyngka na ka skhim MGNREGS, ia kaba ka shnong ka la pan jingbit na ka tnad PWD ha u snem 2016.

Ia kane ka jingpan jingpynbit la pdiang da ka tnad PWD ban pyntrei ia kane ka lynti ïaid kjat ha rud ka surok PWD hynrei kynsan ha ka taiew ba la dep ka tnad ka la phah pynsangeh ia kane ka jingtrei bad kane ka la pynlong ia ki bor pyniaid shnong ka Mawtap ban leit kynduh ia ki bor bahalor ka tnad ban pan jingshai halor kane ka jingpynsangeh trei.

Hynrei ka jingkren kyllain bad bym shai na ka liang u Executive Engineer ka la pynlong ia ki paidbah ban pynpaw ka jingpyrshah halor ka jingbym pynshai bad ka jingbym wan mih na ka liang ka Ophis ban ia pynbeit halor kane ka kam. Hynrei hynne ka step, na ka liang ka tnad PWD ka la phah ia u maharal ban wan ai dak bad shah ia ka shnong ban shna ia ka lynti ïaid kjat.

U Bah A War, Rangbah Shnong ka Mawtap Pyllun, Sohiong u la pynpaw ka jingai khublei ia ka tnad kaba la ailad ia ka shnong ban pyntrei biang ia kane ka lynti ïaid kjat ia kaba la shna khnang ba kan long ka jingiada ia ki nongshong shnong khamtam ki khynnah skul. La iathuh ba la ioh ia ka shithi ha ka sngi Nyngkong ba la shah ban trei biang ia ka lynti iaid kjat ha ka jaka jong ka PWD.