Weng noh ia u Director ka NEIGRIHMS ong u Conrad ia u myntri ka koit ka khiah ka GoI

Shillong 3 Jymmang: U bah AL Hek myntri ka koit ka khiah jong ka sorkar jylla u la ong ba ka kynrum kynram kaba la mih hapoh NEIGRIHMS hospital ka mih man ka por naduh ba la wan shimti director u Dr DM Thapa.
Haba kren mynta ka sngi sha ki lad pathai khubor, u bah Hek u la iathuh ba mynta ka sngi, la khot jingialang ia ki bor pyniaid ka NEIGRIHMS bad la thah ba ki dei ban pynbeit ia ka jingiakhih ki doktor ka Cardiology khnang ban nym ktah ia ki nongpang.
Na ka liang jong ka sorkar kala pan ia ka kaiphod ruh mardor ia ka jingiakhih ki doktor bad la bthah ruh ha kajuh ka por ba ki dei ban iapynbeit para maki bad ka bor pyniaid ban lait ki paidbah na ka jingeh,la ong u bah Hek.
U la ong ba la bthah ia u director ba un khot ia ka jingialang kyrkieh ia ki doktor ban iapynbeit ia kane ka kam ing kam sem jongki.
Ha kajuh ka por,u la ong ba ma u bad u Conrad K Sangma, u myntri rangbah ka jylla, kila pynsngew ha u myntri katnad ka koit ka khiah ka ri ban weng noh ia u director ka NEIGRIHMS bad ban thung da uwei pat namar ba ka lah ban don ki daw kiba la pyllong ia kane ka jaka sumar ban mih ka kynrum kynram naduh ba la wan shimti u Dr Thapa.
U Bah Hek u la ong ba kam dei ba ki shun shimet ia u director hynrei ka jingiai mih ki jingiakhih,ka la don ki daw naduh ba wan shimti u Dr Thapa kum u director”,la ong u bah Hek.