Shillong, Nailur 23: U Bah Wellbirth Rani nongkhot ia ki 13 seng, u la iathuh ba ha ka jingiashong pyrkhat jong ki, kila shim ia ka rai ban pynlong noh da ka jingiakhih shong kyllain mungor namar ka jingbym leh ei ei ka sorkar ban sdangnoh ia ki “Entry-Exit” point ha ka jylla ban iada na ka jingwan rung kyrthep ki briew ban a bar.
Ha ka jingphah khubor jong u Bah Rani mynta ka sngi u la ong ba ia kane ka jingiakhih yn pynlong ha ki ar tylli ki jaka, kawei ha Shillong bad kawei ha Tura, ia kane ka jingiakhih kin pynlong ha ka 04th Risaw 2018. Ha kine ki sngi kin sa pan jingbit na ki Deputy Commissioner lada ioh ne ym ioh ruh kin iaid sha khmat ia kane ka jingiakhih.
Ban thaw ia kine ki “Entry- Exit” point ka dei halor ka ain kaba la shna da ka iing dorbar thawain jong ka jylla ia kaba la tip kum ka “Meghalaya Residents Safety and Security Act, 2016. Katkum ka jingiakren bad ka sorkar ka long ba baroh ki jaka ban buh ia ki jaka rung jaka mih kin long 14 tylli ha ka jylla baroh kawei, hynrei kiba don eh ban leh noh ki long lai tylli, ha Ri Bhoi, Jaintia Hill bad West Khasi Hills.
Haba ia dei bad kine ki jaka ka sorkar kala dep ban pyndep ia baroh ki jingdon kam na ka bynta ban shim ia ki jaka hynrei balei ka sorkar kam shym la treh ban shim haduh kine ki sngi. Na ka liang jong ki 13 seng kim lah shuh ban shu sngap ia kaei kaba ka sorkar kala dep ban shna ia ka ain, ka sorkar ka dei ban pyntrei kam ia kane ka ain kaba la dep shna.
Kumba ka long mynta ka NRC hapoh ka jylla Assam kala iaid sha khmat bad kibriew ki bym don ha ka NRC kila sdang ban phet sakma sha kiwei ki jylla jong ka thain shatei lam mih ngi jong ka Ri India bad lada ka jylla Meghalaya kam leh ei ei kan suk ia ki briew ban wan rung sha kane ka jylla Meghalaya.La ong u Bah Rani nongkhat ia ki 13 seng.
