Shillong, Nailur 25: U Chief Executive member jong ka Khasi Hills Autonomous District Council (KHADC) u Bah HS Shylla, u la ong ba la ioh pdiang ia ka shithi na u Under Secretary jong ka tnad political jong ka sorkar jylla kaba la thoh sha ka KHADC ha ka 19th Iaiong 2017 halor ka jingdawa jong ka seng HYC ban pyntrei kam ia ka Bengal Eastern Frontier Regulation Act, 1873.
Ha kane ka dorkhas ka jingdawa jong ka HYC na ka sorkar ka long ban pyntrei kam ia ka Bengal Eastern Frontier Regulation Act, 1873 ban iada na ka jingwan tuid kyrthep ki mynder. Ka HYC kala ai ia kane ka dorkhas sha u myntri rangbah ba rim ka jylla u Dr Mukul Sangma bad na ka liang jong ka sorkar pat kala thoh sha ka KHADC halor kane.
Haba kren ha ki nongthoh khubor mynta ka sngi, u Bah Shylla u la ong ba u la lap ia kane ka shithi dang ha kine ki sngi ia kaba la phah da ka sorkar jylla ha ka 19th Iaiong 2017 bad ha dien ba la pule bha ia kane ka shithi la shem ba katkum ka United Khasi -Jiantia Hills District (Aplication of Laws) Regulation 1952, la shem ba u president jong ka Ri India u Rajendra Prasad bam kwai ha dwar u blei u la dep ai ia ka jingmynjur ba lah ban pyntrei kam ia ka ain kiba la pdiang da ka UKJHADC kiba don hapoh katei ka ain.
Kane ka ain The Bengal Eastern Frontier Regulation Act, 1873 ka don hapoh jong kane ka United Khasi -Jiantia Hills District (Aplication of Laws) Regulation 1952, kaba mut ba ka KHADC ka lah ban pyntrei kamia kane ka ain. Na ka liang jong ka EC kala rai ban khot ia ka dorbar ba kyrpang ban shim ia ka rai ban pyntrei kamia ka Bengal Eastern Frontier Regulation Act, 1873 hapoh u pud u sam jong ka KHADC.
