Shillong, Lber 30: Kum shi bynta ka jingpynkhreh jong ka Sorkar ban iakhun pyrshah ka jingpur ka jingpang Novel Coronavirus (COVID-19), ka Tnad Skill Development and Entrepreneurship (MSDE) jong ka Sorkar pdeng ka la rai ban pyllait baroh ki National Skill Training Institute (NSTI) bad ki hostel jong ki ba don ha kylleng ka ri ban pynkylla sha ki jaka pynsah ne pynthiah marwei kum ki quarantine isolation.
Ia kane ka rai la shim da kane ka Tnad ban pynbiang ia ki jingpyrshang jong ki bad ka Sorkar Pdeng ha ka jingpynkhreh na ka bynta kane ka jingpang kaba la pynlong ia ka ri baroh kawei ban pakhang shnong haduh 3 taiew ban pynshlur ia ka jingiajngai iwei na iwei hapdeng ki briew.
Ka MSDE ka la ai ruh sha ka Tnad ka koit ka khiah jong ka Sorkar pdeng ia ka thup kyrteng jong shi lak ngut ki briew kiba la ioh jinghikai pyntbit ha ki rukom ai jingsumar lyngba ki prokram bapher bapher hapoh ka Skill India Mission.
Kine ki kandidet kiba la ioh jinghikai pyntbit ha ki kam bapher bapher, kin kyntiew ia ki jingpyrshang ban tehlakam ia ka jingpur bad jingai jingsumar ia ki briew kiba ioh ia kane ka jingpang ha ki jaka pynsah, pynthiah marwei bad ki hospital ba la buh na ka bynta kane ka kam.
Nalor kane, la iasam ruh ia ka thup kyrteng jong 2000 ngut ki nongai jinghikai ha ki rukom ai jingsumar bad palat 500 ngut ki nongpeit pyrman ha ka jingai jingsumar bad ka MoHFW.
Shuh shuh, ki nongtrei jong ka Tnad ki la rai ruh ban nohsynniang kaba duna eh kumba shi sngi ka tulop jong ki sha ka PM CARES fund, ban iarap ia ki jingpyrshang jong ka Sorkar ban iakhun pyrshah ka jingpur ka corona virus.
U Dr.Mahendra Nath Pandey, Myntri ba dei khmih ia ka Skill Development and Entrepreneurship u la ong ba ka jingbynrap ia ki NSTI kan iarap ia ki bor pyniaid Distrik bad Jylla ha ka jingai jingsumar ia kito kiba la ioh ia une u khniang jingpang da kaba pynbiang shuh shuh ia ki hospital bad ki jaka sumar.
“Ha kaba iadei bad jinglong kaba don mynta ha kylleng satlak ka pyrthei namar ka jingsaphriang ka Novel Coronavirus, ka Tnad Skill Development jong ka Sorkar Pdeng kan ai baroh ki jingkyrshan sha ka Sorkar Pdeng ha ka jingiakhun pyrshah ia kane ka jingpang.
La kyrpad ia baroh ki Regional Director jong ki NSTI ban ai ka jingiatreilang ba pura bad ki bor pyniaid jong ka Sorkar Jylla ban iarap ia ki ban pynbiang ia ki jingdonkam ha kano kano ka por ba ka don ka jingjia. Nalor kane, ki Sorkar Jylla ki lah ruh ban pyndonkam ia ki phyllaw jong ki ITI na ka bynta kane.”
Ia ki NSTI la pyniaid da ka Directorate General of Training, kilong ki institute ba hakhmat eh ban ai ka jinghikai ha ki sap treikam (specialised skills) bad ki don ki jaka ai jinghikai bad jaka sah (hostel) ha kylleng ka ri. Ki kandidet kiba jan don shi lak ngut ki ban ai jingiarap ha ki kam ba kyrkieh bad ki kam ba iadei bad ka isolation ha ka jingiakhun pyrshah ia ka COVID-19 ki la pyndep ia ki jinghikai pyntbit ha ki kam bapher bapher ba kynthup:
Ka tnad Skill Development and Entrepreneurship jong ka Sorkar Pdeng ka phaikhmat ha ka jingkyntiew ia ki sap treikam. Naduh ba la sdang ia ka, ka MSDE ka la sdang ia ki kam ba kongsan bad ki jingpynkylla halor ki polisi bad ki kyndon; ka jingplie ia ki prokram ba thymmai bad ki scheme, ka jingwanrah ia ki jingdonkam ba thymmai bad ka jingkyntiew ia ki institution ba la don lypa, ka jingiatreilang bad ki Sorkar Jylla, ka jingiatreilang bad ki karkhana bad ka jingai mynsiem ban kyntiew ia ki sap treikam.
Ka Tnad ka thmu ban pynduh ia ka jingeh hapdeng ka jingdawa bad ka jingdon ki briew ba la pyntbit ban kyntiew ia ki sap ba thymmai bad ki buit ba thymmai ym tang na ka bynta ki kam ba la don lypa hynrei kumjuh ruh ia ki kam kiba yn dang wanrah thymmai. Haduh mynta, palat lai klur ki briew ki la shah hikai pyntbit hapoh ka Skill India. Hapoh ka flagship programme jong ka, ka PradhanMantriKaushalVikasYojana (PMKVY) 2016-2020, ka Tnad ka la ai jinghikai pyntbit palat 73 lak ki kandidet haduh mynta.
