Shillong, Jylliew 15: Ki nongtrei bylla jongka MeECL hapoh ka lama jongka MeECL Progressive Workers’ Union (MPWU) kin pynlong ia ka jingsangeh treikam kaba khlem buh por naduh ka 18 tarik u bnai June 2018 ban pynpaw ia ka jingpyrshah ia ka jing pynbor ia ki nongtrei ban soi ia ka contract ba long beain bad ka jing kuman bad sngap mynthi ki bor ba halor ka MeECL ban pynbiang ia ki jingdawa ki nongtrei bylla.
Baroh ki nongtrei bylla ka MeECL kiba trei hapoh office, kiba leit sam bill light, kiba shna light, kiba trei ha ki control room ne power house bad kiba trei ha kiwei kiwei ki jait kam kin sangeh treikam na ka bynta ban dawa ia ka jingsiew kaba dei hok kat kum ka jingtrei.
Ki mat jingdawa ba lah dep buh hakhmat ki bor ba dei peit ki long ban pynlong nogtrei ba pura noh ia ki nongtrei bylla, ban pyntrei kam ia ka jingsiew kaba mar ka juh ia ka jingtrei kaba dei ia ka juh ka kam kat kum ka hukum ka Supreme Court, ban pyntrei kam noh mardor ia ki jingmyntoi ba ka bor ba dei peit ka la kular ban ai lyngba ka shithi No.MeECL/CA/PER/153/2016/58 dt. 10/04/18, bad ban siew noh ia ka arear bad ka bainong sngi ki nongtrei mandays ne workcharge kat kum ka dor ka minimum wages kaba thymmai bad ban nym pynbor ia ka ban soi contract aggrement kaba long beain bad knieh noh ia ka hok ki nongtrei bylla.
Ha ka jingiadei bad ka jingithuhnohkum kinongtrei ba pura bad ka jingsiew kaba ka juh ia ka juh ka kam kaba ki trei, ka ba dei peit naduh u bnai Nohprah 2017 haduh mynta ka la ai jubab beit manla ka por ba ka dang bishar bniah ia kane ka kam. Kane ka jingleh ka bor ba dei peit ka la buh ia ki nongtrei bylla ha ka jinglyngngoh bad jingpisa mynsiem namar kim tip lano kane ka kam kan sdang .
Kumta la dawa ia ka Management ba kan leh kloi ia kane ka kam ban ithuh noh ia ki nongtrei bylla kum ki nongtrei ba pura namar bun ki nongtrei ki dei kiba la trei lah bun snem bad ka rta wad kam ruh ka la kut.
Sa kawei ka jingleh ki bor ba halor ka MeECL kaba pynbitar lep ia ki nongtrei bylla ka dei ka jingkylla ktien ka bor ba dei eit halor ki jingmyntoi ba kila kular ban ai kat kum ka shithi ba ki la ai sha ka union ha ka 10/04/18. Ka Management kat kum katei ka shthi ka la kular ban ai ia ki nongtrei sngi, nongtrei kontrak ia ka PF, CL , Earned Leave, Maternity Leave, Overtime bad ban kyntiew ia ka bainong sngi 5% ia kiba la trei 5 snem, 10% ia kiba la trei 10 snem bad 15% iakiba la trei 15 snem shaneng.
Hynrei ha ka shithi ba ka Management ka la ai sha ka union ha ka 04/06/18, ka la pynshai pat ba ia kine ki jingmyntoi ki nongtrei bylla (casual) kin ioh lada ki soi ia ka coontract aggrement . Kane ka jingleh jongka Management ka dei ka jing bym khein snep ia ka ei kaba lah dep iakren na mynjur bad ruh ka long pyrshah ia ki labour laws kiba bun.
