New Delhi, Naiwieng 06: Ka Tnat Housing and Urban Affairs (MoHUA) ka la khreh ban sdang ia ka sienjam “Ki Longkmie ia ka Um, ka Um ia ki Longkmie” hapoh ka skhim Atal Mission for Rejuvenation and Urban Transformation (AMRUT) jong ka ha ka jingiatreilang bad ka National Urban Livelihood Mission (NULM) jong kane ka Tnat.
Ka Odisha Urban Academy ka dei kaba iatrei lang ha ka jingai jingnang jingstad. Kane ka campaign ka rakhe ia ka “Jal Diwali” bad kan sdang naduh ka 7 tarik u Naiwieng. Kan bteng haduh ka 9 tarik u Naiwieng, 2023.
Kane ka campaign ka thmu ban ai rynsan ia ka jingai bynta ia ki longkmie ha ki kam kiba iadei ba ka um. Yn ai jingnang jingstad ia ki shaphang ki rukom pynkhuid ia ka um da kaba ialam ia ki sha ki jaka pynkhuid um kiba tip kum ki Water Treatment Plant (WTP) ha ki nongbah jong ki.
Ha kine ki jingleit sha kine ki jaka kin ioh jinghikai shaphang ki kam ba kongsan ha ka jingpynpoiia ka um kaba khuid bad kaba shngain sha ki longiing.
Shuh shuh, kine ki longkmie kin ioh jingtip shaphang ki kyndon kiba iadei bad ka jingtestia ka um kiba pynthikna ba ki briew ki ioh ia ka um katkum ka jingdonkam jong ki. Ka jing thmu ba kongsan jong kane ka campaign ka dei ban wanrah ia ka jingsngew longtrai ki longkmie ia ki jingdon jingem kiba iadei bad ka um.
Ka India ka don palat 3,000 tylli ki jaka pynkhuid um, ha kaba lah ban pynkhuid palat 65,000 MLD bad ki lah ban treikam ban pynmih palat 55,000 MLD. Ha kane ka campaign, ki Self Help Group (SHG) jong ki longkmie kin leit peit ia palat 550 tylli ki jaka pynkhuidum kiba lah ban pynmih palat 20,000 MLD ka um (palat 35% jong baroh ka um kaba mih ha ka ri).
Ki longkmie ki don ka bynta kaba khraw ha ka jingpyndonkamia ka um ha ka longiing. Da kaba pynkup bor ia ki longkmie da ka jingnang jingstad shaphang ki rukom pynkhuid um bad ki jingdon jingem, ka MoHUA ka thmu ban kyntiew ia ka bor jong ki ban pynthikna ia ka jingioh ia ka um kaba khuid bad kaba shngain ha ki longiing jong ki.
Kane ka campaign ka thmu ban pynbeitia ka jingiapher kyrdan hapdeng ki shynrang bad kynthei da kaba kyntiew ia ka jingai bynta ha ki kam kiba kham bun ka jingdon bynta ki shynrang.
Ka phase I jong ka “Um ia ki Longkmie, ki Longkmie ia ka Um”, ka “Jal Diwali” kan don ka jingiashim bynta na baroh ki Jylla / UT (lait na ki 5 tylli ki jylla kiba dang hap hapoh ka Model Code of Conduct), ha kaba la antad ba yn don ka jingiashim bynta da palat 15,000 ki longkmie na ki SHG na kylleng ka ri.
Ki kam ban peit bniah hapoh kane ka jingialap ki long, Ka jingpynsngewthuh ia ki longkmie shaphang ka rukom treikam ki jaka pynkhuid um bad ki jaka test ia ka um, Kyntiew ia ka jingai bynta bad ka jingiashim bynta lyngba ki souvenir bad ki jingthoh da ki SHG jong ki longkmie, Ka jing pynsngewthuh bad ka jingai jinghikai ia ki longkmie shaphang ka skhim AMRUT bad ka jingiarap jong ka ban pynbiang ia ki jingdon jingem kiba iadei bad ka um
La kyrmen ba ki jingseisoh jong kane ka prokram kin kynthup ia ka jingkiew ka jingsngewthuh shaphang ki rukom pynkhuid um, ka jingsngew longtrai bad ka jingbahkhlieh, ka jingkyntiew ia ka jingai bynta, ka jingpynkupbor ia ki SHG jong ki longkmie, ka jingseisoh ha ka imlang sahlang bad ka nongrim na ka bynta ki sienjam ban wan.
Ki ophisarna ka AMRUT bad NULM kin plie lad ia kine ki jingleit da kaba jied ia ki jaka pynkhuid um. Ka MoHUAka la kyntu ia ki ophisar na ki Jylla bad ki nongbah ba kin iashim bynta bad ai jingkyrshan ia kane ka sienjam ka ban long ka jingjamshaphrang sha ka jingai bynta ia ki longkmie ha ka kam kaba kongsan kaba iadei bad ki jingdon jingem ha ki kam kiba iadei bad ka um hapoh ka AMRUT.
