New Delhi, Nohprah 10: Ka bynta ba 7 jong ka Smart India Hackathon (SIH) kan sdang ha ka 11 tarik Nohprah, 2024 ha 51 tylli ki centre ha kylleng ka ri. U Myntri Sorkar Pdeng ba dei khmih ia ka Tnad Pule Puthi, Dharmendra Pradhan, un pliepaidbah ia kane ka jingialang lyngba ka bor internet.
Ka SIH kadei ka sienjam ha kylleng ka ri kaba pynbiang ia ki samla pule ka rynsan ban pynbeit ia katto katne ki jingeh ba ngi ki mad ha ka jingim jong ngi ba manla ka sngi bad wanrah ia ka rukom pyrkhat kaba niewkor ia ka jingsaindur thymmai bad ka jingpynbeit ia ki jingeh.
Kumba long ki bynta ba ladep, ki kynhun jong ki samla pule kin peit ia ki jingbatai ia ki jingeh ba ai da ki Tnad sorkarpdeng, ki tnad bad ki karkhana lane pynpoi ia ka jingthmu jong ki ha ka thup Student Innovation pyrshah kanokano na ki 17 tylli ki phangpdeng.
Na ka bynta ka SIH 2024, palat 250 tylli ki jingbatai ia ki jingeh la ai da 54 tylli ki Tnat sorkar, ki Sorkar Jylla, ki PSU bad ki karkhana. Mynta u snem, ka la don ka jingkiew kaba 150% ka jingdon ki internal hackathon ha ka kyrdan jong ki jaka pule, kaba la kiewna palat 900 ha ka SIH 2023 sha palat 2247 ha ka SIH 2024, kaba long ka bynta kaba heh tam haduh mynta.
Palat 86000 tylli ki kynhun ki la iashim bynta ha ka SIH 2024 ha ka kyrdan jong ki jaka pule bad kumba 49,000 ngut ki kynhun jong ki samla pule (man ka kynhun ka don 6 ngut ki samla pule bad 2 ngut ki nonghikai) kidei kiba la ai jingmut da kine ki jaka pule na ka bynta ka national level.
Ka phainal jong ka SIH ruh kalong kum ka lad iamir jingmut hapdeng ki ophisar na ki Tnad sorkarpdeng/ ki tnad sorkar bad ki samla pule, ki nonghikai na ki jaka pule kaba kham pher bad kumjuh ruh kaba ai mynsiem ia ki samla pule bad ki nonghikai.
Ki jingithuh ba la ithuh bad kiba la pynbeit ki kynthup 17 tylli ki bynta/ ki phangpdeng ba kongsan ba iadei bad ki kam ba kongsan jong ka ri. Kine kilong ki lad ai jingsumar, ki lad pynpoi mar bad ki kam Logistic, ki Smart Technology, ka Pateng bad ka Deiriti, ka jingiaineh, ka Pule Puthi & ka jingkyntiew ia ki sap treikam, ka kam ba iadei bad ka um, ka rep ka riang bad ka bam, ki teknoloji ba dang mih bad ka lad iada na ki jingjialynshop ki bor ka mariang.
Ka SIH ka la iarap bha ia ka jingsaindur thymmai ha ka India, ka pynkup bor ia ki samla pule bad ki briew kiba la tbit ha ka kam ban pynbeit ia ki jingeh jong ka pyrthei. Ka bynta ba kongsan kaba pynthikna ba kane ka jingjop kadei ka SIH Alumni Network, ha kaba lyngba ka rynsan jong ka (https://alumni.mic.gov.in/), ka don ia ki khana jingjop, ka pyni ia ki jingjop, ki jingkylla. Haduh mynta, ka SIH Alumni ka la seng palat 100 tylli ki Startup, bun na ki ki don ki bynta ba khlain ha ka imlang sahlang.
