Shillong, Rymphang 28: Kum shi bynta ban wanrah ia ka jingiaid beit iaid ryntih hapoh ka ophis Khasi Hills Autonomous District Council, u Chief Executive Member u Bah Shemborlang Rynjah u la pynpaw ba ki kumba saw tylli ki mat ba ha khmat eh ki ban pynbeit ryntih ia ka jingtrei kam hapoh kane ka ophis.
Haba kren sha ki lad pathai khubor u Bah Shemborlang Rynjah u la pynpaw ba ka mat kaba nyngkong eh kadei ban pynbeit ryntih ia ka rukom trei kam hapoh ka ophis KHADC.
Shuh shuh u CEM u la pynpaw ba ka Executive Committee hapoh ka jingialam jong u kum u CEM kan ym ai trading licence shuh sha kino kino ki bar jylla ne ki company ia kaba ki samla Khasi ki la lah ban leh.
“Kane ka rai jong ka Executive Committee ka long ban ai lad ia ki khun samla ba kin lah ban ieng ha la ki jong ki kjat ban kyrshah lade ia lade” ong u Bah Shemborlang.
U Bah Shemborlang u la pynpaw ruh ba donkam ban pynbeit ruh ia ka Building by law jong ka KHADC da kaba peit ryntih ia ka dor ka mur khnang ba kiba duk basuk kim ym shem jingeh haba ki kwah ban shna iing bad bynrap ruh “haba thaw iing ym dei pat ban ktah ia ka mei mariang ne ki tyllong umbam umdih” u la ong.
Sa kawei ka mat ba ki khun samla ki ia kynduh ha kum kane ka por ba mynta kadei ha ka ioh kam ioh jam, kumta u la ong ba ka EC kan wanrah noh da ka policy ha kaba iadei bad ka thung kam thung jam, khnang ba ki khun samla kiba dei hok ban ioh ia ka kam kin ioh.
