Jowai: Ki nongshongshnong jong ka shnong Nongtalang kila sdang biang ban mad iaka jingjynjar naka jingwan ka umsaw haki tyllong umbam umdih jong ka shnong. Ki 7 tylli ki dong kiba shaniah umbam haka tyllong kaba la khot ka Amdap ha kine ki khyndiat taiew kiba la dep kila mat iaka jingeh naka daw ba shisiem bala hap slap ka tyllong um bam umdih jong ki ka kylla rongsaw bad kane ka buh iaki nongshongshnong haka jingeh. Shisien baka um ktieh ka tuid haki tyllong um, wat hadien bala rang u slap da ki bun bun sngi ruh kane ka jingsaw jong ka um ka neh.
Naka liang jong u H.H.Mohrmen uba long ruh u nongialeh ban iada iaka mariang ula iathuh ba ula ioh khubor naki nongshong shnong jong ki 7 tylli ki dong kiba la shah ktah nakane ka jingkylla rongsaw jong ka um kata ka Khlachympa, ka Rymmusan, ka Tympang Club, ka Amlariang, ka Shnongpdeng, ka Shnongklor bad ka Banang ban bad ula iohi hi ruh dala ki jong ki khmat iakane ka jingkylla rongsaw jong umbam umdih jong ka shnong.
Lah ban pynkynmaw ba hadien jong ka jingujor pyrshah iaka jingtih mawshun beain haki thain Nongtalang u DC ula pynjhari iaka hokum 144 ban pynsangeh iaka jingtih mawshun bad la shah biang ba ki nongtih mawshun ban sdang tih; hadien ba kala don ka jingkular naka ki nongialam jong ka seng ban kiar naka tyllong umbam umdih. Hynrei mynta ki dak ki shim kila paw ba naka liang jong ki trai par bad ki nongialam jong ka seng ki nongtih mawshun kim patiaw satia iaka jingkular jong ki kaba ktah iaka imlang sahlang jong ka shnong ka thaw.
Naka liang jong u ma H.H.Mohrmen ula iathuh haki nongaikhubor ba ula pan jingtip lyngba ka RTI la ka jingtih mawshun haka shnong Nongtalang ka dei kaba la ioh jingbit naki bor sorkar ne em. Katkum ka jingtip kaba la ioh lyngba ka RTI naka ophis jong ka State Environment Impact Assessment Authority katkum ka shithi No. SEIAA/GEN/-9/2013/11 date 8 July 2014, naka liang jong ka SEIAA kala pynshai ba haduh mynta ka ophis kam pat ju ai Environment Clearance iano iano ruh haki thain Amlarem. Shuh shuh halor ka jingkylli kaba ia dei ba la ki don ne em kiba la ju wan pan Environment Clearance nakane ka ophis ka jubab ka long ba ym ju don satia naka thain Amlarem kiba ju wan pan EC na kane ka ophi. Ka RTI kaba la buh haka ophis Directorate of Minerals Resources, Shillong lyngba ka shithi No DMR/E (RTI) 841/06/Vol II date Shillong 7 July, 2014 kala iathuh ba namar baka DMR kam shym aibor satia iano iano ban tih mawshun ha Nongtalang kumta kala forward iaka RTI sha ka ophis jong u Divisional Forest Officer (T) West Jaintia Hills District, Jowai bad kumjuh shaka ophis jong u DC West Jaintia hills ban ai jingtip sha u nongwad RTI.
Namar kata ka jingtih mawshun ha Nongtalang kumba paw ka long ka kam beain kaba khlem da ioh iaki kot ki sla kiba biang. Naka liang jong u Mohrmen ula kyntu iaki bor sorkar ban kin leh ia kaba donkam khnang ba kan ym jia kumba jia ha kaba iadei bad ka jingtihdewiong. Ula kyntu ruh iaki nongialam jong ki nongtih mawshun ba kin bat iala ka jong ka kular bad ban kiar naki tyllong um khnang ba kan ym ktah iaka umbam umdih jong ka shnong ka thaw. La ong u bah H H Mohrmen .(SP News)
