Shillong, Nailar 20: Ka jingialang ban kynmaw ia ka sngi kaba u Governor General of India ( la pynkylla sha ka kyrteng – President Ri India hadien 26 Jan 1950) Sorkar India u la soi bad mynjur ia ka Instrument of Accession and Annexed Agreement ha 17 tarik August 1948 bad ki 25 Hima Federation of Khasi States, ka la long ha ka 19 August 2013 – Por 11am, Iing Club, Pyndemumiong, Mairang, Hima Nongkhlaw
Ha katei ka sngi sngi la plie ia ka jingialang da u Paiem Phrester Manik Syiemlieh, Syiem Hima Nongkhlaw & Vice President, Federation of Khasi States, ha ka jingiadonlang bun ki Sordar, ki Rangbah Shnong, ki Myntri, ki Riewrangbah, ki nongialam jong ka KSU,(West Khasi Hills) bad kiwei kiwei ki seng bhalang, kiba la wan na ki Hima bapher bapher, bad la ia don lang u Bah John F Kharshiing, Co-Chairman, MSPB, bad Chairman, Grand Council of Chiefs, Spokesperson, Federation of Khasi States, u Bah Erwin Syiem Sutnga, u Ma Sing Mulieh, kiba la wan ban ia shim bynta ha katei ka jingialang, bad ha la ioh ia ki jingrwai tynrai bad la pynlong ia ka jingsngap jar kaba shi minit ban kynmaw ia ki Khlieh Nongsynshar naduh Shnong, Raid haduh Hima, (u Dolloi Rymbai, u Sirdar Hima Mawlong, kiba la khlad noh dang shen)
Hadien kane ka la don ka jingpynher ia ka lama jong ka Grand Council of Chiefs of Meghalaya kaba dei ruh ka lama jong ka Federation of Khasi States bad la ioh ia ka jingkren plie na ka liang u Paiem Syiem Hima Nongkhlaw Syiemship, uba la pdiang sngewbha ia ki Sordar, ki Rangbah Shnong, ki Myntri, bad ia ki seng bhalang kiba la ia don lang ryngkat. U la kyntu ia ki rangbah baroh ban shim khia ban smat ban wad ban tip ia la ka hok ka riti ka dustur namar ha kane ka jingsynshar mynta bun sa tang ki Ain kiba mih kiba khylliap ia ka hok longtrai jong u paidbah uba kyrpang ha kane ka sla pyrthei.
U Paiem Syiem Hima Nongkhlaw u la aiti ha u Bah John F Kharshiing, Co-Chairman, MSPB, & Chairman, Grand Council of Chiefs of Meghalaya, Spokesperson, Federation of Khasi States ban pyniaid ia ka jingialang.
Na ka liang u Bah John F Kharshiing, u la ong ba ka 17 tarik August 1948, ka dei ka sngi ba u Governor General of India (President of India) u la pdiang, mynjur bad soi ia ki Dulir Instrument of Accession and Annexed Agreement ha ka 17 tarik August 1948.
Wat lada ka Sorkar India ka ithuh bad ka tip ia kine ki hok jong ngi, hynrei ha kum kane ka por ngi ia kynduh jingeh halor ki ain kiba mih na sha lyndet na parliament kiba khreh ban knieh ia kine ki hok jong ngi lyngba kita ki ain kiba ki Hima Khasi States kim pat mynjur. U la ong ba U Mawnongrim uba skhem ka Ri dei tang ha ka Dulir Instrument of Accession and Annexed Agreement 17 August 1948
Katkum katei ka dulir, lyngkot khlem da pynjrong ka long ka ki Hima Khasi States ki don ka hok ban ioh ia la ka jong ka Council kaban long ka Council kaba khlem party kaba khlem liang. Namar ym lah ban khmih lynti ba kan don ka jingiaid beit haba ki Council ki long kiba shah liang. U la pynpaw ba kiba bun ki Hima /Elaka haba ki ia kynduh jingeh ki hap leit kiew iing lieh iing saw ban iada ia la ki hok ki riti ki dustur namar ka politic kaba rung bad pynkulmar ia ka synshar khadar.
U la ong ba ka jingeh ka Ri lah ban sa pynbeit ynda ka Sorkar India ka la dep ban pyndep ia ki jingkular kumba la kdew bad pruid dak hapoh ka IOA & AA.
Kumba ka long mynta, ka jingbuddien ka long kaba khlem sangeh ban pynsngew sha ka Sorkar India ba kan pyndep ia kaei kaba ka la dep mynjur ha kitei ki dulir bad kawei na kitei ki kyndon ka long ba ki hima khasi states kin ioh ia la ka jong ka iing dorbar ( Council) ha kaba yn don lang naduh Shnong, Raid haduh Hima. Kumba ka long mynta ki Hima Khasi States kim don jaka thaw ain lane kim don la ka jong ka Council bad kim don nongmihkhmat ha ki District Council lane ki Assembly kiba mih na ka bynta ki Hima/Elaka kumba ka long mynta ki mih na ka bynta la ka jong ka Seng ym na ka bynta ka Hima/Elaka.
U la ong ba kam slem shuh ba ka Sorkar India kan hap ban phai khmat ban pyndep ia kine ki jingiateh bad ki jingkular.
La ioh jingkren ruh na u Bah Kodin Nongrum, Myntri Hima Sohra, u Bah Erwin Syiem Sutnga, bad na u Ma Sing Mulieh kiba na ka jingsngew khia la ia wan ban ia shim bynta ha ka tei ka jingialang. Na ka liang kitei ki arngut ki rangbah ki la ia wer ia ki Sordar bad ki Khlieh Nongsynshar ban ia mih paidbah haba don kino kino ki jingialang halor ka hok long trai halor ka khyndew ka shiap, kum shibynta ban pyni ia ka Sorkar India ba ngi dang don ba ngi dang iai bat ia la ka long long trai halor ka khyndew ka shiap.
Haba pynkut, na ka liang ki Sordar bapher bapher, kiba la ia kren ki la ai mynsiem bad la ai jingmut ba ka por ka la ih lehse ban leit rah ia ka Instrument of Accession bad ka Annexed Agreement, 17 August 1948, sha ka Iing Bishar kaba heh duh kaba ngi tip kum ka Supreme Court khnang ban ia shai ka jingiadei hapdeng jong ki Hima Khasi States bad ka Sorkar India.
Ha katei ka sngi kumban sah kynmaw ia katei ka sngi , u Bah John F Kharshiing, u la sam ia ka jingthoh kaba lyngot kaba la pynkhreh ha ka ktien khasi kaba kyrteng ‘ ka ain teh mraw’ (Appointment and Succession of Chiefs and Headmen Act 1959, bad u la kyrpad ia ki Nongsynshar Shnong, Raid bad Hima, ban kylli na ki MLA & MDC hato katei ka Act ka pynkhlain, iada ne ka pynswai ia ki Hima / Elaka hapoh kane ka bri hynniewtrep.(SP News)
