Tura, Risaw 26: U Abdul Kalam Azad u ba la shah kem ha ki pulit jong ka Garo Hills halor ka jingkynnoh ba u la don kti ha kaba pyniap ia u Ram Chandra Thakur jong ka shnong Bhaiybhari ha West Garo Hills ha ka miet 25 tarik u la leit phet na kti jong ki pulit katba ki dang leit rah ia u sha Phulbari CHC.
U kalam u la leit phet ha ka por ba u ong ba u don ka jingshitom ha ka met jong u bad ym shym la lah ban bam mynta la ar lai sngi bad na ka liang jong ki pulit ba la synran lang ia u sha katei ka jaka ai jingsumar jong ka sorkar ki la pynshong ia u ha ka shuki hynrei ki khlem bat ia u, katba u wei na ki pulit ki dang leit ban kylli na ka nurse kaba trei ha katei ka jaka une u briew u la phet bak katba kin da iohi ki pulit ym don shuh ha ka jaka shong.
Mar ia iohi ia kane ka jingjia na ka liang jong u u pulit u ba ialam ia u u Ajay Chetri u la pyrta ia kiwei ki para pulit katba ki da ia beh une u briew u ba la shah kem ha ki pulit u la lait phet bak bad ki pulit kim shym la ioh ia u ban kem biang haduh mynta ka sngi.
Na ka liang jong u DC jong ka West Garo Hills u Parvin Bakshi u la ong ba ia kito kiba don kti ha kaba pynlait ia une u briew ba la shah kynnoh ba u pyniap briew yn nym aili hynrei yn leh da kaba tyngeh bad kajingtohkit ha kaba ia dei bad kane ka jingjia ka la iaid sha khmat.
Na ka liang jong u SP Mukesh Singh, u la ong ba ka jingkem ia u ka long tang ban tohkit hynrei kane ka jingphet na ka kti jong ki pulit ka la pynshisha ba u ia don bynta ha kaba shimnoh ia ka jingim jong u Thakur. Na ka liang jong ki pulit ki dang ia thwet haduh mynta.
Kane ka jinglait phet jong ki koidi na ka kti jong ki pulit mynta u snem kam dei ka sien kaba nyngkong hynrei ka la dei ka sien kaba lai, kaba nyngkong ka long ka jinglait phet jong u Nurul Islam u pulit ba la shah kynnoh ba u la bat bor ia ki kynthei bad ka jingleit phet jong u lehnoh GNLA na phatok Tura.(SP News)
