Shillong, Jymmang 10: Ka kynhun ki samla ki ba thum ban thep ia ka kam pulit ha ki post ba pher bapher ia ka ba la ioh ban lam khmat da ka samla Banrilang Pyngrope mynta ka sngi ka 10 tarik u Jymmang 2024 ki la ioh ban leit ban ia kynduh pat sa shi sien ia u bah CV Diengdoh u ba dei u Secretary jong ka tnad Personal and AR Meghalaya.
Ha kane ka jingiakynduh kila aiti ruh ia ka jingthoh bad ban dawa ruh na u ba u dei ban ai ka jingpynshai ha ka ba iadei bad ka advertisement ka ba la mih ha ka 30 tarik u Lber 2024 ha ka ba ia dei bad ka kyrta thungkam ha ka tnad Pulit.
Ha ba ioh ban ia kren bad ki nongthoh khubor na ka liang ka samla Banrilang Pyngrope ka la ong ba na ka liang u Secretary jong ka tnad Home u la pyntip ba na ka liang ka sorkar ka la dep ban pynmih ia ka office of Memorandum ka ba thymmai mynta u bnai Jymmang ha ka ba wat ha duh kine ki sngi ba mynta ym shiem la lah ban pynmih paidbah bad ym shym la ioh I ba kan don hapoh ka Official webside jong ka Sirkar Jylla.
Ka samla Banrilang ka la ong ruh ban na ka liang ki samla ki la kut jingmut ban kin leit ban tied jingkhang sha poh ka Iing bishar ha ka ba iadei bad kine ki kynrum kynram ki ba iadei bad ka jingthep kam ha ka tnad Pulit ha ka ba ka la pynpaw ba hadein ka jingleit jong ki ban buddien la bun bun sien ia kane ka kam hynrei na ka laing ki baor pyniaid bad ka sorkar kim shym la shim khia ia kane ka bynta.
Kane ka samla ka la buh ruh ka jingkylli ia ka sorkar ba kaei ka daw ka ba pynlong ia ki ba kin slem ban pynmih ia ka OM wat ha dien ba ki la dep ban pynmih ia ka Advertisement.
U wei na ki samla u la pynapw ruh ba ka sorkar ka dei ban pynlait shwa ia ka OM ba thymmai ha ka ba kat kum ka OM ka ba rim ia ka ba la pynmih ha u snem 2022 ka kyrta thung kam ka dei ha duh ka 32 snem ka kyrta na ka bynta ban thep ia ki kam ki jam ha ki tnad sorkar bapher ba pher.
