Shillong, Nailar 20: Ka All Meghalaya SSA Non Teaching Staff’ Association (AMSSANTSA) mynta ka sngi ka 20 tarik u Nailar 2024 ka la pynsangeh noh ia ka jingiakhih shongkyllain myngor khlem por, kaba la iaid la 21 sngi, hadien ba ka sorkar jylla ka la mynjur ban pynbeit ryntih bad ban pynkiew noh ia ka tulop jong ki.
La pynbeit ba kane ka jingsiew thymmai kan treikam naduh ka 1 tarik u Iaiong, 2024. Ïa kane ka jingmynjur la rai hadien ka jingïalang jong ka Rationalization Committee ba la pyniaid da u Commissioner & Secretary ka Education u Vijay Mantri mynta ka sngi.
Ha ka jingiakren bad ki nongthoh khubor na ka liang ka President jong ka AMSSANTSA ka kong Jennyfer Synrem ka la ong ba ngi la rai ban weng noh ïa ka jingïashong kyllain mungot khlem pud por jong ngi hadien ba ngi la lah ban pynurlong ïa ki jingdawa kiba kynthup ïa ka 2% ka seniority allowance bad 5% ka jingpynkiew tulop ba manla ka snem.
Watla, ngim pat ïoh 80 % ka jingpynkiew tulop hynrei ngi sngewhun haba ngi peit ia ka jingshisha ba ka sorkar ka la rai ban pynbeit ia ka rukom treikam. Ka la ong ruh ba ka jingthaw ia ka Rationalization Committee, ha kaba ngi ruh ngi long ki dkhot jong ka, ka la leh shibun kiei kiei halor ka jingiapher ka jingsiew.
Mynta kila ioh ia ka tulop kaba iapher kaba shong kat kum ka jingtrei slem ia ka kam ym kumba long ha ki por mynshuwa ha kaba u nongtrei ba dang rung thymmai un shim ia kajuh ka tulop kum kito kiba la trei la 18 snem.
Ka kong Synrem ka la ong ruh ba ngi sngewkmen ba ia kane ka jingsiew thymmai yn pyntreikam noh naduh ka 1tarik Iaiong, 2024. Ngi la ai khublei ia ka sorkar hapoh ka jingialam u Myntri Rangbah ka jylla u Conrad K Sangma uba la pynbeit ia ki jingeh jong ngi lyngba ka Committee.
Ka la ong ruh ba kham mynshwa, ngi la kyntait ia ka rai jong ka sorkar ban ai 25% ia ka jingpynkiew tulop namar jan mar shiteng na ki bym dei ki nonghikai, kim shym la shah kynthup hapoh ka jingtyrwa bad kam long kaba shonghok namar ba kam don kano kano ka jingpynkiew tulop ha kine ki 8 snem ba la dep.
