Shillong, Naiwieng 12: Ka jingiakhih sha thgnan jong ki samla pule ka skul bah NEHU kala kot sha ka phra sngi mynta ka sngi bad ka jingdawa ka long ba u Vice Chancellor u dei ban hiar shuki noh bad ban weng kam u Registrar bad u Deputy Registrar la ong u samla Sandy Sohtun President NEHUSU.
U President ka NEHUSU la iathuh ba mynta ka sngi ka NEHUTA bad ka MeTTA kila ia kynduh ia u Lat ka jylla C.H Vijayashankar bad ka jingiakynduh ka long ha kaba iadei bad kane ka jingeh kaba jia mynta hapoh katei ka skul bah.
Na ka liang jong u Lat ka jylla haduh mynta ym pat khot ia ka NEHUSU kaba dei ka seng ki samla pule katei ka skul bah, hynei ki khmih lynti ba kan sa don ka jingkhot ban ia krenhalor kane ka jingbteng jong ka jingiakhih ha NEHU.
Kiwei ki kynhun kum ka NESO mynta ka sngi kala phah da ka jingthoh sha u myntri ka tnad pule puthi ka sorkar pdeng ha kaba ia dei bad kane ka jingjia hapoh kane ka skul bah ha NEHU bad ha ka shithi kila pynpaw ia kaei kaba la jia bad kila kyntu ia u myntri ba u dei ban leh ei ei halor kane ka jingjia.
Ha kane ka sngi kiwei ki kynhun samla pule na kylleng kila ia poi ban ai mynsiem ia kiba shong shah thngan kum ka seng long kmie na Nongmynsong, ka seng Ri Bhoi Youth Federation bad la shai ka sngi ruh kin dang don ki samla pule na kiwei ki Kolej ba kin leit ban ai mynsiem.
