Shillong, Kyllalyngkot 10: San ngut ki riewpawkhmat na jylla Meghalaya ki dei kiba la shah jied ban leit peit ia ka Republic Day Parade 2025 ha Kartavya Path, New Delhi, ha ka 26 tarik u Kyllalyngkot, 2025.
Kine ki long shi bynta ka kynhun ba kyrpang kaba kynthup 35 ngut ki nongmihkhmat na ka thain shateilammihngi, kiba pyni ia ka jingnoh synniang kane ka thain sha ka jingthmu na ka bynta ka Swarnim Bharat.
Haduh 10,000 ngut ki briew ki dei kiba la shah khot kyrpang na kylleng ka ri ban sakhi ia ka Republic Day Parade 2025 ha Kartavya Path, New Delhi, ha ka 26 tarik u Kyllalyngkot, 2025.
Napdeng kine ki dei ki 35 ngut ki briew na ka thain shateilammihngi ba kynthup 8 ngut na Assam, 22 ngut na Sikkim bad 5 ngut na Meghalaya kiba la shah jied kum ki nongmihkhmat jong ka jingnoh synniang ka thain na ka bynta ka Swarnim Bharat.
Kine ki briew kiba la shah khot kyrpang ki kynthup ia ki longkmie ba seng kam lajong, ki nongjop National Award bad ki nongioh jingmyntoi na ki skhim kyrpang jong ka Sorkar Pdeng.
La peit bniah ban khot kyrpang ia ki dkhot jong ki Self-Help Group (SHG) kiba trei ha ki kam kiba iadei bad ka jingpynmih lad kamaijakpoh, ka jingiada ia ka mariang, ka koit ka khiah, ka jingioh ia ka bam kaba tei, ka jingkhuid, ka jingpyniasoh ia ki kynhun Panchayati Raj, bad ka jingpynkupbor ia ki kynthei. La peit bniah ruh ban khot ia kito ki briew ki bym pat ju poi sha Delhi.
Ha kane ka jingleit jong ki, kine ki nongshah khot kyrpang kin sakhi ia ka Republic Day Parade bad kin leitjngoh ruh ia ki jaka ba kyrpang kum ka National War Memorial bad ka PM Sangrahalay.
Shuh shuh, kin ioh ban iakren bad ki Myntri Sorkar Pdeng ka ban pyniar ia ka jingsngewthuh jong ki ia ka hiar pateng jong ka India bad ki sienjam ba dang pyntreikam jong ka Sorkar.
