Shillong, Naitung 15: Mynta ka sngi u bah Paul Lyngdoh myntri ka tnad jngohkai bad u symbud myntri u bah Sniawbhalang Dhar ki la shong jingialang, ba la shim ia ka rai ban bthah ia baroh ki trai kali kamai ban wah ia ki jingtip jong u ba niah ia ka kali kamai.
U bah Paul haba kren shaki lad pathai khubor ha ba la wai ka jingialang, u la ong kane ka rai ka dei ban pynthikna ka jingshngaiñ ki paidbah kumjuh ki nongwan shangkai pyrthei ha ka jylla Meghalaya
U bah Paul u la ong kane ka hukum kan treikam ha baroh kawei ka Meghalaya bad baroh ki kali kamai naduh ki kali kamai (Local Taxi), ki kali Tourist, ki Bos, ki kali sumo bad kino kino ki kali kiba shim jingbit na ki DTO ban kamai
U bah Paul u la ong shuh shuh ba ka sorkar kan ialeh ban pynthikna ia kane ka kam hapoh shi bnai, ki nongniah kali ki dei ban thoh ia ka kyrteng u nongñiah, u nombar phones bad ka license number hapoh ka kali, kane ka jingleh ka sorkar kan iarap ba tang u drivers ba ju niah ka kali, ba lah ban niah ka kali.
U bah Paul u la ong ba kane ka lah ban pynthikna ia ka jingshngaiñ ki nongleit nongwan, halor kane ka sorkar kan sa ai da ka jingpynbna sha ki paitbah bad hadien kata ka sorkar ka ai por shi bnai, hadien kata yn sa sdang ban pyntreikam ia kane.
