Shillong, Risaw 09: Tang hapoh Shi bnai ba ngi lah mad ia ka jingsngewsih kthang kum ka Jaidbynriew halor ka jingjia ba sngewsih jong ka jingkhlad noh jong I wei I Heprit bad ka jingkthang ka mynsiem kam shym la duna.
Hynrei, mynta sa shisien pat la mad ia ka jingduhnoh ia ka mynsiem ba lui lui jong uwei pat u Heprit. Ka jingjah klep bad shah pyniap dusmon jong ki Para Ri kiba lui lui ha ki riewthrangsnam, ha kine ki sngi kiba mnynta ka lah nang bteng na kawei ka por sha kawei pat.
Kine ki jingjia ki pynpar Niangkhriat ia ngi lang baroh ki dkhot jong ka Jaidbynriew bad ki long kiei kiei kiba ym lah ban pdiang da lei lei ruh em.Hynrei, kum ki Nongshong shnong ym lah ban len ba la shah teh shah khum ha ki kyndon ain namar ba ym ban shim ia ka ain ha ki kti la jong bad kita kiba lah ban pyntreikam ia ka ain pat I kumba kim lah ban teh lakam ia ki kam sniew kiba jia na ka por sha ka por.
Mano kein ban shim ka jingkitkhlieh ia kine ki jingjia? Mano kein ban pynthikna ba ki briew kiba donkti ha kine ki kam sniew kin shah pynshitom? Bad khamtam eh mano ban shimkhia ban pyntikna ba ka Ain bad ki bor kijong ka kin ai ka jingiada kaba pura ia ka jingin bad ki jingdon jingem jong ki Nongshong shnong jong ka Jylla’?.
Ne kin shin ba ka Sorkar bad ki bor Pulit kim lah shuh ban tehlakam ia ki kàm sniew, kam pyntriem bad ban kem bad pynshitom ia ki Riewsniew?. Ne la ka Sorkar bad ki bor Pulit ki don bynta lang ha ka ban pynkharoi ia ki kam sniew ha ka imlang sahlang?. Kine ki dei ki jingkylli kiba ngi kwah ban buh hakhmat jong ka Sorkar bad ki tnat treikam ki jong ka.
Kan myntoi aiu ba ngin phohsniew ia kata ka roi ka par bad ka jingkiew jong ka Jylla lada kum ki Nongshongshnong ngi im ha ka jingsyier mynsiem na kawei ka sngi sha kawei pat.
Kaba donkam kadei ka jingshngain bad ka jingiada ia ka jngim bad jingdon jingem jong ngi kum ki Nongshongshnong bad ka kamram ka dei jong ka Sorkar bad ki bor kijong ka ban pynthikna ia kata.
Ha kum kane ka por, na ka liang ka Seng hi baroh kawei, ngi phah ka khubor sngewlem sha kiba haing hasem jong U Heprit Kyrshanbor Kharmudai ha ryngkat ki jingduwai ba u Blei Nongbuh Nongthaw un phah ia u mynsiem bakhuid ban pyntngen ha kum kane ka por.
