Shillong, Jylliew 12: Ha ka 10 tarik Jylliew 2026, ka Bharat ka la thoh ia ka bynta kaba thymmai ha ka histori jong ka synshar paidbah ha kaba u Shriman Narendra Modi Ji u la pyndep ia ka jingshakri kaba iaibteng kaba 4,399 sngi kum u Myntri Rangbahduh, da kaba long u Myntri Rangbahduh ba la shah jied slem tam jong ka India ban bat ia ka kam khlem sangeh.
Kane ka jingjop kaba kongsan ka pyni ym tang ia ka jingkut jingmut kaba skhem jong u ha kaba tei ia ka ri hynrei ka jingsngewskhem kaba iaineh bad jingngeit ba ki briew jong ka Bharat ki ai ha ka jinglong nongialam ba iohi jngai jong u.
Ka long kum ka jingpynpaw ia ka jinglong nongialam ba iohi jngai jong u, ka jingaiti ba radbah jong u na ka bynta ka roi ka par jong ka ri, bad ka jingaiti lut na ka bynta ka bha ka miat bad ki jingangnud jong ki briew ka Bharat.
Ka jinglong nongialam kaba wanrah jingkylla: 4, 399 sngi bad ter ter, Kum u Pradhan Sevak jong ka ri, u Shriman Narendra Modiji u la ialam ïa ka juk jong ka jingkylla kaba ym pat ju jia mynno mynno ha Bharat, kaba la ïalam da ki nongrim jong ka jingsynshar kaba bha bad ka Rashtra Pratham (ka jingpyrkhat shuwa ia ka ri).
Kumba ka histori ka burom ia u Abraham Lincoln na ka bynta ka jinglong nongialam ba skhem jong u ha kaba pynkut ia ka jingshah ban bein jong ka jingpynlong mraw ia ki briew bad ban pynnneh ia ka burom sha ki million ngut, ki pateng ban wan kin kynmaw ia u namar ka jingpyllait ia palat 25 klur ngut ki briew kiba duk na ka jingduk tasam.
Lyngba ka jingthmu jong u, ki sienjam kiba radbah, bad ka jingsynshar kaba wanrah jingkylla, la pynkupbor ia bun ki longiing da ka lad, ka burom, bad ka jingkyrmen, kaba iarap ia ki ban pdiang ia ka jingkular jong ka jinglaitluid ha ka ioh ka kot bad ka lawei kaba bha. Ka jingnoh synniang jong u kan sah jingkynmaw ha ka histori kum ka jingjop kaba khraw ha ka jingshakri ia ki briew.
Nalor kata, ki sienjam wanrah jingkylla jong u ki la pynthikna ia ka burom bad ka jingshngain ha ka imlang sahlang na ka bynta ki million ngut lyngba ka pule puthi, ka iing, ka jingkhuid jingsuba, ka lad ai jingsumar, bad ka jingshngain ha ka bam.
Palat 44 klur ngut ki nongshong shnong ki la ïoh ïa ka jingpynthikna ïa ka jingsumar kaba bha lyngba ka skhim Ayushman Bharat, kawei na ki prokram ai jingsumar kaba heh tam ha ka pyrthei na ka bynta ki paidbah.
Palat 12 klur tylli ki longing ha ki jaka nongkyndong ki la ïoh ïa ka umbam umdih kaba khuid bad kaba lah ban shaniah lyngba ka Jal Jeevan Mission, kaba wanrah ïa ka burom bad ka jinglong jingman kaba kham bha sha ki longïing kiba bun.
Naduh u snem 2020, ka jingbteng ban ai ïa ki mar bam khlem jingsiew ka la ïada ïa ka jingïoh bam ia jan 80 klur ngut ki briew, da kaba pynthikna ba ym don ki nongshong shnong kiba shah iehnoh shadien.
Shuh shuh, palat 4 klur tylli ki longïing ki la pynurlong ïa ka jingangnud ban ïoh ïa ka ïing kaba shngain bad kaba shirta, kaba pynkhlain ïa ka jingsngewshngaiñ, ka burom, bad ka jingkyrmen jong ki na ka bynta ka lawei.
Baroh, kine ki sienjam ki long kum ki dak kiba iaineh jong ka jingsynshar kaba sngewlem bad ka jingaiti kaba skhem na ka bynta ka bha ka miat jong uwei pa uwei u nong India.
Ka jingthmu jong u Myntri Rangbah duh Modiji ka la pynkupbor ïa man la ka bynta jong ka imlang sahlang— la ka long ïa ki kynthei, ki samla, ki nongrep, bad kiba duna ha ka ioh ka kot.
Ka jingmih jong palat 3 klur ki Lakhpati Didi ka long kum ka sakhi kaba khlain ia ka jingthmu jong u ia ka roi ka par ba ialam da ki kynthei, katba ki sienjam hapoh ka Nari Shakti ki la iarap ia ki kynthei ban don ka bynta kaba kham kongsan ha kaba tei ia ka ri.
Ka jinglong jingman ka pule puthi bad ka koit ka khiah jong ka India ka la nang kiew stet bha lyngba ka jingseng ia ki IIT, ki AIIMS, ki medical college kiba thymmai, bad ki jaka pule kiba kham halor, kaba la wanrah ia ki lad ki lynti ki bym pat ju don mynno mynno ruh na ka bynta ki samla jong ka ri.
Ha kajuh ka por, ka Bharat ka la sakhi ia ka jingkylla kaba khraw ha ki jingdon jingem. Naduh ka jingpyniar stet ia ki rel Vande Bharat, ki kad liengsuin, ki surok bah, bad ki steshon rel haduh ki projek pyniasoh kiba wanrah jingkylla kiba poi sha ki jaka kiba jngai tam, ka jinglong nongialam jong u ka la buh ia ki nongrim jong ka Bharat kaba mynta, kaba iasoh, bad kaba don jingangnud.
Kine ki jingjop kim shym la pynsted tang ia ka jingkiew ka ioh ka kot hynrei ki la kyntiew ruh ia ka jinglong jingman jong ki million ngut ki nongshong shnong ha kylleng ka ri.
Ka Bharat ka la paw kum ka nongïalam ha ka pyrthei ha ka jingsaindur thymmai ha ka kam digital, semi-conductor space technology, ka jingpynmih ïa ki dawai ïada, bad ka jingshna ïa ki mobile, kaba la kyntiew ïa ka kyrdan jong ka ha ka pyrthei ha ka liang ki teknoloji ba dang mih.
Vikas Bhi, Virasat Bhi: Ka Jingpyndon burom ïa ka Pateng jong ki Tamil, Ka Jingkyntiew ïa ka Tamil Nadu
Kaba pynlong ïa u Myntri Rangbahduh ka ri u Narendra Modi Ji uba kyrpang shisha napdeng ki nongïalam ba mynta kadei ka jingngeit skhem jong u ba ka jingkiew shaphrang bad ka riti dustur kim dei ki jingmut kiba ïakhun hynrei ki bor kiba ryntih.
Lyngba ka rukom pyrkhat ba iohi jngai jong u ka “Vikas Bhi, Virasat Bhi”, u la pyni ba ka ri ka trei na ka bynta ka jingkylla sted katba ka dang sah ha ka jinglong tynrai jong ka.
Hapoh ka jingïalam jong u, ka Bharat ka la sakhi ïa ka roi ka par kaba wanrah jingkylla ha ki jingdon jingem, ka teknoloji, ka jingshna tiar, bad ka bha ka miat jong ka imlang sahlang, katba ha kajuh ka por ka mad ïa ka jingsngew sarong kaba wanrah jingkylla ha ka kolshor, ki ktien, ki riti dustur ba kynja mynsiem bad ka pateng hyndai jong ka.
La ka long ka jingpynthymmai ia ki jaka kyntang, ka jingkhyllie im biang ia ki dak ba iadei bad ka kolshor, ka jingrakhe ia ki ktien tynrai, ne ka jingpynneh pynsah ia ki tiar hyndai kiba kordor, ka jingsynshar jong u ka pyni ia ka jingpyniasoh lang kaba kyrpang jong ki jingangnud jong ka juk mynta bad ki jinglong ba iaineh.
Ka rukom treikam jong u Myntri Rangbahduh ka ri u Modi Ji ka pynkylla ia ka rukom tei ia ka ri da kaba pynshisha ba ia ka roi ka par ba shisha ym dei ba la thew tang da ka jingkiew ka ioh ka kot, hynrei da ka jinglah jong ka ri ban pynneh pynsah, ban sumar bad ban pyniar ia la ka pateng sha ki pateng ban wan.
Ka rukom pyrkhat jong u kaba ong “Vikas Bhi, Virasat Bhi” ka la kylla long ka nongrim ba ialam lynti ia ka Bharat kaba sngewskhem bad kaba kiew shaphrang—kaba iaid shaphrang da ka jingshlur katba ka dang iaineh skhem ha ka mynnor kaba donburom jong ka.
Napdeng ki nongïoh jingmyntoi kiba khraw tam na kane ka rukom pyrkhat kdei ka Tamil Nadu bad ka jaitbynriew Tamil ha ka pyrthei, kaba ka pateng kaba riewspah ha ka ktien, ka kolshor, bad ka riti dustur jong ki ka la ïoh ïa ka jingithuh, jingrakhe, bad jingkyrshan kaba ym pat ju ïohi mynno mynno ruh hapoh ka jingïalam jong u Myntri Rangbahduh u Modi Ji.
Ka Tamil Nadu ka la ïoh jingmyntoi shibun na ki sienjam wanrah jingkylla hapoh u Myntri Rangbah duh Modiji, kynthup ïa ka jingpynheh ïa ka Chennai Metro Rail, ka Chennai–Bengaluru Expressway, ka Tamil Nadu Defence Industrial Corridor, ka jingpynthymmai ïa ki kad lieng bad ki kad liengsuiñ, ka jingpynheh ïa ki surok bah, ka jingpynthymmai ïa ki steshon rel, bad ka jingkieng rel Pamban.
Ka jingplie paidbah ïa ka jingkieng rel ba thymmai jong ka Pamban, ka jingkieng vertical lift ba nyngkong eh jong ka India, ka long kum ka jingjop kaba kongsan, kaba kyntiew ïa ka jingpyniasoh bad ka Rameswaram bad kaba pyni ïa ka jingtbit jong ka India ha ka kam engineering.
Ka Tamil Nadu, kaba la paw ruh kum ka jaka pdeng kaba kongsan na ka bynta ki tiar electronic, ki mobile phone, bad ka jingshna ia ki iPhone namar ka jingbuddien ïa ka jingthmu jong ka Atmanirbhar Bharat.
Ym don u Myntri Rangbahduh barim uba la kyrshan ïa ka ktien Tamil, ka kolshor, bad ka pateng da kajuh ka jingïaid beit, ka jingïohi, bad ka jingpynsaphriang kylleng ka pyrthei kumba la leh da u Narendra Modi Ji, kaba wanrah ïa ka jingithuh ba thymmai ha ka ri bad ha ka pyrthei ïa ka riti dustur jong ki Tamil.
Ka jingrakhe jong u kaba man ka por ia ka jingriewspah jong ki Tamil ha ka thoh ka tar bad ka pateng, ha India bad shabar ri, ka la ktah jur ia ki Tamil ha kylleng ka pyrthei.
Ka jingpyndonkam jong u ia ki kyntien jong u riewstad ba khraw jong ka Tamil u Kaniyan Poongunranar ha ka United Nations ka la long ka khyllipmat jong ka jingsngew sarong kaba khraw na ka bynta ka riti dustur jong ki Tamil bad na ka bynta ka India.
Da kaba wanrah ia kane ka khubor kaba jylliew sha ka pyrthei, u la pyni sha ka pyrthei ia ki tynrai ba junom kiba don ha ka kolshor Tamil. Ka pyrthei ka la sngewthuh ba ki Tamil ki la kyrshan ia ka jingmut ba donburom jong “Kawei ka jinglong briew” da ki spah snem shuwa u Karl Marx. Ka sienjam jong ka “Vasudhaiva Kutumbakam” ruh ka shong tynrai ha kane kajuh hi ka rukom pyrkhat.
Ki sienjam kum ka Kashi Tamil Sangamam bad ka Saurashtra Tamil Sangamam ki la pynskhem ia ki jingiadei ha ka kolshor bad pynpaw ia ki jingiadei jong ka riti dustur kiba iaineh kiba pyniatylli ia ka ri jong ngi.
Ka jingbuh ia ka Sengol ha ka iing dorbar Parliament ba thymmai jong ngi ka long ka jingithuh kaba biang ia ka jingnoh synniang jong ka Tamil Nadu sha ka pateng jong ka synshar paidbah bad ka riti dustur jong ka India.
Ka jingleit jngoh jong u Myntri Rangbah duh Modi ji ia Gangaikonda Cholapuram, ka pyni ia ka pateng jong ki Chola, bad ki sienjam ban pynphai biang ia ki tiar hyndai kiba kordor na shabar ri, kynthup ia ki copper plate jong ka juk Anaimangalam Chola dang shen, la ioh ia ka jingiaroh na kylleng.
Baroh ryngkat bad ka jingkyrshan jong u ban pynneh pynsah ia ki temple, ki jaka ba iadei bad ka pateng, ka thoh ka tar tynrai, bad ki riti dustur, kine ki sienjam ki la kyntiew ia ka kyrdan jong ka riti dustur Tamil ha ka pyrthei bad ki la pynpaw ia ka jingburom jong u ia ka ktien bad ka kolshor jong ki Tamil.
Ha man la ka juk, ka histori ka sakhi ia ka jingmih jong ki nongialam kiba ka jingthmu bad ki kam jong kim sahkut hajuh ha ka por jong ki. La kynmaw ia kum kine ki briew kum ki ‘Yug Purush’ namar ki pynwan dur ia ka jinglong jong ka ri bad ki ai mynsiem ia ki pateng. Lyngba ka jinglong nongialam kaba wanrah jingkylla, ka jingaiti sha ka roi ka par jong ka ri, bad ka jingshakri kaba radbah na ka bynta ki briew, u la paw kum u ‘Yug Purush’ jong ka Bharat kaba mynta.
Nga ngeit skhem ba ka jinglong nongialam ba tbit jong u kan ialam ia ka ri sha ka Viksit Bharat @ 2047. U nongthoh udei u Vice President jong ka Ri India.
