Shillong, Naitung 03: Kum shi bynta jong ka jingpyntreikam iaka Special Intensive Revision, u District Election Officer jong ka East Khasi Hills District, Shillong, u Abhilash Baranwal, I.A.S. u la pynlong da ka jingialang bad ki nongmihkhmat jong ka kam sain pyrthei myn ha ka 3 tarik, Naitung 2026 ha ka por 10:30 mynstep ha ka ophis treikam jong u Deputy Commissioner, East Khasi Hills District, Shillong.
U District Election Officer u la dep pynbna iaki dkhot jong ka phorm pynrung kyrteng kaba la dep sam sha ki khatsan tylli ki Assembly konstitwansi lait noh iaka Sohra Sub-division kaba la don haduh 63731 tad haduh ka por 5:00 janmiet myn ha ka 2 tarik, Naitung 2026.
La pyntip ruh ba ki dkhot kiba don lang ba la dep iohpdiang iaki phorm Booth Level Agents (BLA) na ki ar tylli ki party National bad kawei ka State Party.
La don ka jingsngew khia ha kaba iadei bad ki kaiphod ba la ioh, ha kaba la kynnoh ba la don ki nongtrei BLO kiba la sam iaki phorm pynrung kyrteng na ka iingsah jong u nongthaw ain barim ka 18-West Shillong (GEN) Assembly konstitwansi.
Katba u Deputy Commissioner, East Khasi Hills District, Shillong u la pyntip sha ki dkhot ba don lang ba ia katei ka jingjia, la shimkhia da u District Election Officer bad ki bor ba dei peit jong ka Electoral Registration Officers (ERO) bad la don ka jingjurip mar mar da ka AERO myn ha ka 2 tarik, Naitung 2026 na ka bynta ban lap iaka jingshisha.
Ki bor ba dei peit jong ka BLO kila shah hukum ba dei ban wanrah biang iaki phorm pynrung kyrteng ne ki Enumeration forms kiba la sam myn ha ka 30 tarik, Jylliew 2026, 1 bad 2 tarik, Naitung, 2026. La pyntip ruh ba ha ka 3 tarik, Naitung 2026, ki nongpeit ka BLO kin iarap shimet iaki BLO ha kaban sam iaki Enumeration forms sha ki briew ba dei hok ban thep vote.
Ka AERO jong ka Assembly konstitwansi kan pynlong iaka jingkynduh kaba man ka sngi sha ki bynta bad peitngor iaka jingsam iaki Enumeration Form tad haduh ban pyndep iaka jingtreikam ka jingpynrung kyrteng.
U Deputy Commissioner, East Khasi Hills District, Shillong u la pynkynmaw biang iaka jingmut jong ka Special Intensive Revision kam dei ka jingpynrung kyrteng thymmai iaki nongthep vote hynrei ban khein ia kiba la don lypa ki nongthep vote katkum ka nonglum kyrteng nongvote jong u 2005, namar kata ka jingkynnoh jong ka jingpynrung kyrteng ia kiba thymmai ki nongthep vote ka long ka nongrim kaba sniew.
U Deputy Commissioner, East Khasi Hills District, Shillong u la pynkut da kaba kren halor ka jingdonkam ia baroh ki nongioh bynta lang jong ka kam sain pyrthei bad ki Dorbar Shnong ban iatreilang ha kaban pynlong iaka jingpyndep treikam ki SIR kan long kaba jop.
