Shillong, Niatung 03: Ka tnad ban kyntiew ia ki kam karkhana bad khaii pateng jong ka sorkar pdeng kaba la tip kum ka ‘Department for promotion of Industry and Internal Trade (DPIIT) kala dep ban pynlong ia ka jingialang jong ki nongseng kam ha Shillong ha ka jingiatrei lang bad ka tnad khaii pateng ka sorkar jylla.
Ia kane ka jingalang la dep ban pynlong ha ka 23/Jylliew/2026, ka jingthmu katei ka jingialang ka long ban pyntip paidbah ia ka ‘Uttar Poorva Transformation Industrialisation Scheme 2024’ kane ka long ban khring ia ki nongwan seng kam ha Meghalaya.
Kane ka long ban pyniakynduh ia ki nongseng kam la jong, ki briew jong ka sorkar bad kiba don bynta lang ha kane ka kam ban khring ia ki nongbei pisa ban seng kam ban iakynduh ban sngewthuh ia ki jait kam aiu kaba ki kwah ban wan seng.
U Anindya Bhattacharya Director ka DPIIT la ong ba ka long kaei kaei kaba sngewtynnad ba na ka UNNATI skhim laioh ban pdiang 101 tylli ki aplikoshon kiba kwah ban seng kam nalor kitei ki dang don sa 73 tylli kaba ki dang bishar bniah mynta.
Kiba bun ma kiba kwah ban be pisa sha kane ka jylla ban seng kam ka long ha ka tnad jngohkai pyrthei bad ki jingtrei kaba ia dei bad ki kam ha ki kam shangshuwari kane ka bynta ka jylla Meghalaya kala khring ia ki nongwan seng kam.
Kane ka jingpynlong ia ka jingkynduh lang ha peng ki nongwan bei pisa ban seng kam, ki bor sorkar bad kiba don ia ki lad trei kam ka long ba kila ioh ban ia kren markhmat bad kane kala pynhun ia kiba kwah ban wan seng kam ha kane ka jylla.
Ka jingiakren ka long ba kumno kin register, kiei ki kyndon kaba ki hap ban bud, kikot ki sla kiba don kam, kiwei ki jingmyntoi ba kin ioh bad kiei kilat jingiarap ban pynkloi ia ka kam.
